Diadomingo mainta tabata tin un Rosario Bibo cu e hoben- y mayornan cu ta bay participa na e Dia Mundial di Hubentud (World Youth Day) cu lo tuma luga na juli-augustus 2023. Esaki ta un start cu Parokia di Tanki Leendert a cuminsa cu ne pa gradici Dios y pidi e ayudo di Mama Maria, cu riba dje e enfoke di Dia di Mundial di Hubentud ta.
Reginald Winklaar, di Ministerio Hubenil Catolico a bisa cu Dia di Hubentud Mundial ta un evento cu ta tuma luga cada tres aña y door di COVID-19 e no por a bay door. Rond mundo ta na altura cu e evento aki lo tuma luga otro aña y cada pais ta prepara un grupo cu ta interesa, cual ta tene recaudacion di fondo pa por logra realisa e biahe aki, pa atende e evento aki cu ta mundial. Edad di e hobennan, oficial ta 18 aña, pero tambe ta acepta e hobennan cu tin menos di 18, pero esakinan mester ta acompaña pa un mayor.
E hobennan di Ministerio Hubenil Catolico, den preparacion pa nan biahe pa Portugal, en conexion cu Dia Mundial di Hubentud (World Youth Day), lo tene varios actividad di recaudacion di fondo. Pa esaki, Winklaar a pidi e pueblo di Aruba pa colabora cu e ministerio. Dia Mundial di Hubentud lo tuma luga na Portugal, cual ta sigur ta costa basta placa, como tambe e estadia ayabou na Portugal. Pa esaki Winklaar ta pidi cooperacion tambe di comercio, pa asina e hobennan por yega na nan meta. Asina tambe nan por cumpli cu nan soño di participa n’e Dia Mundial di Hubentud.
Por drenta den contacto cu e hobennan via e diferente parokianan y e pastoornan, como tambe algun di e hobennan di diferente parokianan, pa asina ricibi mas informacion of un donacion pa asina yuda e grupo di hobennan como tambe nan lider- y mayornan pa yega na nan meta.
E Organisacion Mundial di Dia Mundial di Hubentud ta manda cierto rekisito pa por cumpli cu ne, pa e hobennan, pa ora cu yega Portugal, tur e hobennan ta riba e mesun liña. Diasabra anochi, e ministerio tabata tin e encuentro di e hobennan. Nan ta satisfecho y ta luchando pa logra nan meta, nan ta mira cu e ta algo bunita pa maak mee y ohala cu nan por tabata tin un grupo mas grandi pa participa.
“Ta trata di hobennan cu ta den un edad dificil y hopi lihe nan por desvia for di e caminda corecto. Pa e muchanan aki, na nan parecere mundo ta trata nan un poco straño y tambe iglesia ta trata nan straño, dus pocopoco mester convence nan cu Hesus ta stima nan y cu nan por haci algo pa nan mes, nan famia, nan pais y pa mundo henter. E Iglesia di mañan ta depende di nos hobennan”, Reginald Winklaar, di Ministerio di Hubentud Catolico Aruba.
