Minister di Enseñansa, dr. Armando “Rudy” Lampe, a anuncia un rato pasa cu scolnan lo keda cera te dia 11 di mei 2020. Prome cu esey lo warda riba decision di Gobierno di Hulanda, si acaso nan lo habri scol pa e aña escolar ainda, prome cu dicidi riba posibel prolongacion di e decision drastico aki.
Pa awor mester sigui cu enseñansa digitalisa, riba distancia, manera cu e ta bayendo awo. Gobierno ta gradici directivanan di scol y e docentenan cu ta dunando di nan parti pa promove educacion digital, cu e alumno sinta na su mesun cas.
Minister Lampe a enfatisa awe cu for di aña 2019 caba a anuncia e plan Educacion Nacional 2030 unda a anuncia Digitalisacion di Enseñansa. Awo a agilisa e proceso aki. E mandatario ta compronde cu e proceso a bay abrupto, pero no tabatin ningun otro opcion!
Locual si lo continua ainda ta School Examens, esta SE, cu lo ta entre dialuna 4 di mei te cu diabierna 8 di mei 2020. Centraal Eindexamen si ta cancela, mescos cu na Hulanda. Cu e decision aki, e einddiploma lo depende di Schoolexamens.
Lo purba mas posibel pa e examen bay tambe di forma digital. Si no ta posibel, lo permiti e studiantenan cu no por, pa nan haci e examen na scol mes, pero manteniendo distanciamento social. Na luna di juni lo tin herexamen. Gobierno ta atendiendo cu Hulanda pa nan acepta y reconoce e diplomanan di Aruba aunke no tin eindexamen.
Na final Minister Lampe a sigura cu enseñansa despues di Coronavirus lo ta digitalisa y personalisa. E no ta mira con enseñansa lo regresa manera cu e tabata antes, esey nos por lubida!
