Presidente di Parlamento mr. Juan “Ady” Thijsen a bin determina awe pa tene un reunion riba nivel y sin strobamento constante. A nota cu na diferente ocasion el a para e reunion pa hala atencion di su mesun coleganan di Fraccion di MEP pero na un dado momento hasta di e Ministernan. Na un dado momento el a adverti Minister Presidente mr. Evelyn Wever cu si e no por comporta, cu e lo haya su mes obliga di sak’e for di sala di Parlamento. Nos no ta corda pa e ultimo añanan cu algo asina a yega di sosode, esta cu ta lansa un menasa asina pisa contra e prome mandatario di nos pais!
E problema tabata durante discurso di Paelamentario mr. drs. Richard Arends. Claro durante su disertacion, el a splica Gobierno na placa chikito dicon nan ta actuando robes cu CITGO y cu e compani Mericano tin hopi placa. E tipo di splicacionnan asina no ta cay den bon tera ni cerca e Parlamentarionan cu ta sostene Gobierno y ni cerca e Ministernan, cu ta siguiendo conseho di Bufete di Abogadonan Croes, Wever & Ruiz den e caso aki. Ta opta pa maneha e asunto serio aki den forma politico, en bes di envolvi e ex Ministernan y haci’e un discusion y decision nacional, cu un base amplio.
A nota cu Presidente di Parlamento si a mira e urgencia y seriedad di e caso y no a sconde esey den e forma rigido di atende cu e reunion. El a papia palabra fuerte cu su mesun coalicion y Gobierno, demostrando claramente cu mester y tin separacion di poder entre Parlamento y Gobierno.
E hecho aki berdad den nos sistema ta regla asina cu Presidente di Parlamento tin e di dos funcion mas halto na Aruba despues di Gobernador. Pues e ta riba Minister Presidente den e herarkia politico. Pero den bida real hopi biaha no ta respet’e como tal, ni den salario y ni den poder politico. Awe el a para riba su punto y a pone e Ministernan na nan luga, aunke tur tin mas voto cu ne politicamente. Asina mes el a subraya e realidad cu den e sala ey, t’e ta manda!
