E representante di Aruba pa Reina Hispanoamericana Sarah van der Steen ya caba tin un siman na Bolivia y ta haciendo un tremendo papel eynan, representando nos dushi isla di Aruba.
Un total di 29 pais ta reuni na Bolivia unda cu Promociones Gloria ta organisando e evento aki y tin e candidatanan basta ocupa durante varios dia cu diferente tours y tambe compromisonan cu nan sponsornan pa cu e evento.
Sarah a biaha masha bon prepara y asesora pa su director nacional Sr. Endy Croes y un team di expertonan cu a yude cu pasarela, oratoria, projeccion y hopi otro aspecto mas pa asina e destaca na Bolivia.
Sarah ta un hoben bon prepara y ya tin experencia mirando cu na 2018 a competi den e concurso Miss Teen Aruba International unda el a keda como 1st Runner Up y di eynan caba su preparacion a sigui pa e ta te na unda e ta actualmente.
Mester menciona cu Sarah a biaha cu su querida Mama y tambe a ser acompaña pa su director, coach, make up artist y diseñador Sr. EndyCroes
Sarah mes ta masha contento di con cosnan ta canando aya na Bolivia y ta gradici Aruba pa e sosten ricibi y ta invita tur hende pa ta pendiente pa diasabra dia 8 di februari cu ta e dia final di e concurso Reina Hispanoamerica
Di otro banda EndyCroes a indica cu tin hopi competencia pero ta sigur den e potencial di Sarah y mas ainda ora e mira e reaccion di e hendenan na Bolivia pa cu Sarah su participacion. Sarah ta un dama cu ta scucha tur conseho y ta aplicanan y tambe ta un persona masha simpatica y determina y esey ta su yabi mas fuerte.
Endy ta pidi tur hende pa apoya e candidata door di subi e pagina official di Reina Hispanoamericana riba Facebook y pone un comment y un like na cada potret di e representante di Aruba pasobra ta Aruba e ta representa.
Organisadonan y pueblo di Aruba ta desea Sarah tur clase di exito y ta pendiente pa diasabra e eleccion di Reina Hispanoamericana 2020.
