GLW Foundation, organisado oficial di Miss Teen Aruba International lo tene su di 5 benta anual di Cupcake pa un bon causa yama “Cupcake di Speransa”. E idea aki a cuminsa 5 aña pa sanamomento cu a tende di e caso di Baby Lunah y a dicidi di haci e campaña aki. Pues e idea tabata pa e comunidad yuda pero tog haya algo a cambio di su donacion y p’esey e start cu e proyecto Cupcake di Speransa, George Winterdaal, kende ta na cabes di e organisacion, a bisa.
Mester bisa cu e prome aña a bay super exitoso y a Sold Out e bolonan y e fondo recauda a wordo entrega despues na Sra. Linda Brokke, wela di Lunah den presencia di Miss Teen y su finalistanan na kendenan e famia a keda masha agradeci. Na aña 2017 e interes a sigui crece pa e Proyecto Cupcake di Speransa cual fondonan recauda a bay pa un señora cu ta sufri di e malesa Guillain Barret y cu mester a sigui cu su tratamentonan na Hulanda, na instalacion oficial di candidatanan di 2017. Familiarnan di Sra. Koolman tabata presente pa asina ricibi e envelop for di man di vice presidente Cathy Helder.
Na aña 2018 e comision a dicidi di yuda mas cu 1 persona pero lo enfoca riba e fundacionnan cu ta traha pa muchanan y aki tambe a ricibi nan ayudo. Na aña 2019 a dedica e Cupcake di Speransa pa Ethan, cual fondo a ser duna na su mama Shahaira den presencia di Ethan dia di instalacion di Miss Teen Aruba International 2019.
E aña aki un biaha mas ta dedica parti di e fondo pa Ethan y tambe lo duna e otro parti na un hoben Guineverre kende ta sufri di un condicion severo di Dermatitis y tambe mester di hopi ayudo. For di dia cu a crea GLW Foundation pa organisa Miss Teen Aruba International e meta ta y lo keda “algo mas cu un certamen di beyeza” pa asina yuda tambe den e parti social na Aruba. Durante fin di aña tin e campaña “Un man pa nos ruman” cu na December ultimo a traha mas cu 50 tas pa duna e muchanan cu mester di esaki. Si bo compania, grupo di amistad, coleganan kier coopera cu e organisacion di GLW Foundation, yama 5616151 y asina haci bo pedido y lo deliver esaki pa bo dia 13 y 14 di Februari. Minimo order ta 10 cupcake. No tarda, yama of message awe mes pa bo no keda sin haya y alabes coopera pa un bunita causa cual fondo ta bay bek den cuido y atencion di nos muchanan di Aruba.
Por manda tambe un email na [email protected] … Ban aportana e bunita causa di tambe haci bo Valentine special cu e proposito special aki.
