Santa Rosa, tin algun tempo caba ta haci apelacion na tur cunukero, criado y piscado, pa registra na Santa Rosa. Esaki ta conta tanto pa esunnan cu ta produci den un forma comercial como tambe pa hobby. Actualmente, Santa Rosa ta ricibiendo varios molina di criado di galiña pa webo, cu ta keha cu nan no ta logra bende e caha nan di webo cu nan ta produci y ta lamenta e tempo y placa cu nan a inverti den e produccion.
Actualmente na Santa Rosa, tin solamente 5 persona/compania, cu ta registra como criado di galiña pa webo, mientras cu ta observa cu tin varios criado cu ta bende nan producto riba rednan social. Aruba ta importa un cantidad halto di webo pa aña y e iniciativa di produci nos propio webonan fresco sigur ta uno di aplaudi y cual gobierno ta stimula tambe. Sinembargo, ta dificil pa tin datonan real di produccion y informacion di esunnan cu ta practica e cria di galiña pa webo, si Santa Rosa no tin e informacion necesario. Sin dato, ta imposibel pa por analisa y controla e crecemento di e sector aki, pa asina por duna mas sosten y crea un maneho cu lo aporta na un crecemento structura di e sector aki.
Recientemente Santa Rosa a reuni cu e coleganan di Departamento di Asunto nan Economico (IDEA) y Departamento di Salubridad (DVG), pa a delibera riba un posibel maneho integral di produccion di webo local, den cual por controla e crecemento di produccion, haci control di calidad, sostene e productornan cu ideanan strategico mediante workshop y informacion, con pa mercadea nan producto y asina conscientisa comunidad riba e beneficionan di cumpra webo for di productornan local. Pero prome cu e grupo di trabao por logra e meta di introduci un maneho, nan lo mester conta primordialmente cu datonan concreto manera entre otro, ken, cuanto, na unda etc. ta produci webo y con pa stimula un crecemento riba un base continuo. Den pasado, IDEA conhuntamente cu DVG y Santa Rosa, ya a duna varios charla na e productornan di webo y aki tambe, a pidi nan pa registra na Santa Rosa y na KVK, pa asina por considera nan como un contribuido na e produccion di webo local. Mester remarca cu productornan di webo no ta paga belasting, no mester tin e miedo di registra como productor di webo comercial, pero si e ta importante pa gobierno por tin un bista completo di cuanto webo nos isla ta produciendo y asina determina con lo por introduci un maneho cu ta enfoca ariba calidad, sostenibilidad y continuidad como productor.
Kico bo mester pa registra
Na momento cu bin pa registra na Santa Rosa, mester trece tur informacion di tereno (situatieplan), copia di convenio pa e huurgrond of documento oficial den caso di tereno propiedad, buki di huurgrond di DIP como tambe ID y registro di KVK, si ta produci riba un escala comercial. Den caso cu ta famia of un tercera persona ta haci uzo di e tereno den nomber di e doño, mester tin un machtiging mediante cual e doño di tereno ta duna permiso pa haci uzo di e tereno. Den caso cu ta un negoshi mester tin registro di KVK (Kamer van Koophandel). Na momento cu bin haci registracion lo mester yena un formulario cual tin diferente pregunta, dependiendo kico ta e sector cu ta activo aden. Tene bon na cuenta e ultimo puntonan aki pa no tin mal comprendemento na momento cu mester registra. Percura pa tin tur cos na man.
Beneficionan na momento cu registra
Na momento cu registra casi sigur pregunta lo ta por ehempel kico Santa Rosa lo por yuda cu ne. Na momento cu tin tur informacion logicamente lo por yega na remarca pa ricibi servicionan di Santa Rosa. Esaki ta encera den caso cu ta un agricultor por haya e servicio di entrega di truck di awa. Dado caso por yega na remarca tambe na e awa pa agricultor cual Santa Rosa hunto cu WEB Aruba NV ta ofrece. Negoshinan por ta liber di impuesto riba cierto producto pa nan propio uzo. No lubida e parti importante aki, cu ta pa propio uzo. Na momento cu descubri ta bende e producto aki na tercera lo por cobra bek e suma di impuesto. E ta mira cu ta haciendo negoshi cu lo cu locual tabata e meta.
Si no ta logra pa bishita Santa Rosa personalmente, lo por registra online, door di e-mail tur dato cu ta menciona ariba, via [email protected] of por yama 5858102 pa ricibi mas informacion.
“Sostene nos Cultura, practica Cria, Pesca y Agricultura”
