Na e academia di Gregory Milliard, tin preparacionnan tumando luga, pa asina e representa Aruba den exterior.
Aruba lo topa cu Merca, na Merca mes. Aruba por ta testigo di e gran pelea aki, caminda cu un yiu di tera lo saca cara di nos pais.
Milliard ta splica cu e ta preparando sumamente fuerte. E pelea lo bay ta na Mohegan Sun na New York, dia 16 di april. Ta prome biaha cu un Arubiano ta bringando den Bellator. Ta un di e eventonan mas grandi di mundo, si compar’e cu UFC.
Milliard lo marca historia unda cu lo pone Aruba su nomber riba plataforma mundial. E evento principal lo ta entre Yoel Romero cu Anthony Johnson, cu ta dos persona cu ta leyenda den e deporte di MMA.
Milliard lo ta e prome yiu di tera cu lo ta formando parti di e evento aki. E pelea aki lo ta cu e Mericano Julius Anglickas cu ta 9-0 gana den profesional. Esaki lo ta un pelea sumamente duro.
Asina mes, Milliard ta sumamente contento di ta forma su team, consistiendo di su coach Alexander Mastrodonte, fo’i Brasil. Tambe e tin diferente otro persona cu ta forma parti di e team pa loke ta training, nutricion y sin lubida e sponsornan cu ta sostene Milliard. Ya nan ta conociendo su trayectorio cu el a bin ta haci pa 15 aña.
Aruba ta competi y ta purba di trece tur Arubiano hunto cu nan bandera y T-shirt. Tin e energia positivo ey. Ultimo biaha a trece tur hende na Milliard Academy. Tabatin por lo menos 250 hende. E biaha aki, debi na e pandemia, ta bay hacie na Drive Inn, teniendo cuenta cu distanciamento social. Bellator a contact e representantenan di Drive Inn, lagando nan sa cu Milliard lo ta competiendo pa 8’or, tur cos ta depende di dia 11, si e lo bira mas laat of no.
Na Drive Inn por tin 300 auto den e luga. E meta ta pa haci e evento aki uno sold-out. Milliard ta convenci di lo marca historia den Mohegan Sun dia 16 di april.
