Dia cu SADA a entrega e carta na Minister di Economia y Finansas, unda cu nan kier a haya contesta di e minister, entrante 8 di Februari, splicando y bisando cu nan lo respeta e convenio y cu nan lo ehecuta esaki per 1 di Maart 2018. Y si en caso cu esaki no haya un contesta y no ehecuta esaki, lo bay corte. Den e mesun rosea a bisa cu SADA ta dispuesto pa sinta na mesa, pa haya un clarificacion. No pa bin cu aanpassing of cambio den e convenio. Una bes cu a wordo splica cu nan ta respeta e convenio y mirando cu e parti legislativo tin cu tuma luga, treciendo esaki na e miembronan, a indica cu lo wanta un rato den bay corte. Segun presidente di SADA, Edward Maduro, ta duna e gobierno e espacio aki.
Semper SADA a traha na un manera responsabel y profesional. Logicamente si no ta haya oido di gobierno tin cu pone presion riba dje, pasobra nan tambe kier haya un clarificacion. Tin di compronde cu tin hopi asunto cu ta regarda e presupuesto cu ta andando awor aki, pero esey no ta kita afo cu bo por laga e sindicto di Douane un banda y keda sin contesta.
Esey en todo caso ta tras di lomba. E minister a disculpa su mes pa loke ta e parti di comunicacion di su banda. E sindicato ta keda hopi optimista pa traha den un bon relacion den futuro.
Peso financiero
Den pasado, tempo cu minister saliente a bisa cu tin espacio den su presupuesto, mirando cu ya caba e tempo ey e presupuesto di douane ya a cera y no por a hincanan den e presupuesto pa loke ta 2018, pero si a compronde for di director di Douane, cu e minister saliente a bisa cu e tin espacio den su presupuesto di 2018. Pero no obstante esey, y a bisa e minister tambe durante e reunion di 9 di Februari, cu a haya hopi jammer cu ta papia cu e situacion financiero, pero ta hayabo cu den un dienst awor aki ta tumando cierto decisionnan, unda cu lo perhudica gobierno financieramente. Den sentido cu ora ta bay over pa duna comercio green light, y bo no tin un departamento cu tin cu bay haci e nacontrole pa ora cu dado caso cu tin ontduiking di belasting, esta un departamento cu tin cu haci nacontrole, cu tin suficiente hende den e departamento ey cu por haci tur e controlnan aki.
Si en caso e aña aki 2018, comerciantenan pa un of otro motibo a keda sin paga cierto derechonan, cierto intensional of no, pero debi cu e departamento falta personal, bo ta haya cu gobierno aki 2 pa 3 aña por ta ta bay haya e placa ey bek di esnan cu a keda sin paga. Si bo ta bisa den un situacion financiero precario, e ora bo tin cu krenk op bo controlnan pa bo saca tur bo placa cu bo tin derecho di haya segun ley, bo tin cu pone hende traha y wak bo haya e placa awor aki. Pasobra ta awo bo tin problema financiero. No sa con e situacion lo ta aki algun aña.
Si gobierno bisa cu aki dos pa tres aña e presupuesto lo ta balansa of ta cerca di un surplus, por ehempel, pero ta awo tin e problema financiero. Awo tin cu aumenta e controlnan pa asina haya tur e placa cu gobierno tin cu haya segun ley, por medio di impuesto. Pero no cu bo ta bay tuma un decision, pa complace comerciante bao di e pretexto di bevorder economia.
