Taekwondistanan di Stichting Brazil Taekwondo ta train cu Master Henk Meijer, kende ta di Hulanda y e ta un ex campeon den taekwondo, pero tambe un coach. Pa algun aña e ta traha hunto cu e atletanan di Stichting Brazil Taekwondo, unda cu e biaha aki a conta cu su presencia pa dos siman.
E ta traha cu e rumannan Klabér, kendenan normalmente den luna di december ta bay Hulanda pa participa den un training camp pa competencianan internacional y Hulanda. E biaha aki tur evento y training na Europa a cancela door di COVID-19, p’esey el a opta pa bin Aruba y sigui traha cu nan. A haci esey pa prepara e metanan di 2021 y tur cos a bay bon. Door di e situacion di Coronavirus, esey ta pone cu e trainingnan tabata limita tanto aki como Hulanda. E atletanan ta den bon condicion, pero pa awo no tin competencia y esey ta pone cu tin suficiente tempo pa prepara.
Diabierna awo otro atletanan di otro scol lo ta presente y Master Meijer a bisa cu e kier comparti su conocemento cu nan. E kier duna nan e oportunidad pa mira con ta traha na Europa. El a biaha diferente caminda y a duna seminario di taekwondo. E biaha aki el a bin cu un otro persona, kende tambe lo traha cu e rumannan Klaber pa yuda nan. Deporte ta parti di bida y cada mucha mester haci esey pa nan tin contacto social, pa tin confiansa propio y fit.
Zahyon Klabér a cuminsa haci taekwondo cu su 4 aña y e tabata train na Oranjestad, pero despues a muda pa Brazil. Desde e tempo ey ta representa Aruba, cual paisnan cu el a bay ta Merca, Canada, diferente parti di Europa. Tambe el a participa dos biaha na camp training na Korea. El a haci esey pa sigui subi su nivel y tambe haya mas sparing partner pa competi. Segun Klabér, aki na Aruba no tin hopi sparing partner p’e por sigui hisa su nivel. P’esey ta busca yudansa di exterior.
El a cuminsa train cu Master Meijer na 2015 y esey a pone cu nan nivel a subi mas. Durante training e ta siña cosnan nobo y tambe ta mira cua scop por uza of ta sali bon durante competencia. Nan ta cmabia e game plan y saca mas tecnica pa yuda bringa mas facil.