Carnaval semper ta keda un tema di debate. E biaha aki mas ainda, mirando cu SMAC a propone pa hala e celebracion pa luna di juli 2021. Esaki sigur a trece causa comentario den e comunidad carnavalesco. Dos carnavalista conoci, esta Lienchi Merryweather di Grupo Champagne y Kevin James di Royal Carnival Group a expresa ambos di no tin problema cu e cambio aki.
Royal Carnival Group
Kevin James ta pensa cu ta algo bon. E ta haya cu ta un bon idea pa hal’e pa e fecha ey. Tin su motibonan cu James di su parti ta comenta, cu lo ta mas beneficioso pa Aruba y pa e gruponan di carnaval. Fuera di esey el a comenta cu ta trata aki di e mesun preparacion, djis mester saca e productonan na ora. E ta duna mas chens na hendenan, biniendo for di december, cu ta un luna semper druk y tradicional na Aruba, e ora ey tin un otro seis luna pa por prepara.
Segun James, esey lo boost mas y lo por crece mas locual cu tabata tin anteriormente. Esey ta loke cu James ta sinti. E ta kere e lo ta mas miho y lo crece mas. Tur hende mester adapta. Ta depende kico bin cun’e. E grupo tin su tema y no lo bay cambia tampoco. No a sak’e ainda pasobra no sa kico lo bay papia. Tin hopi preparacion cu mester wordo haci prome cu bay na un carnaval. E gobierno tambe lo drenta aden, e participantenan y tur grupo mester bin hunto cu SMAC pa por trece un bon producto y uno safe pa Aruba.
Di parti di e team di Royal Carnival Group, banda y tur hende ta on pa e temporada ey. Ta algo cu semper nan tabata tin den mente. Awor aki e ta mustrando cu e lo ta un posibilidad. Sigur nan ta on y semper ora cu nan tin nan reunionnan, nan ta papia di esey. Nan ta on, Royal ta ready to go.
Champagne Carnival Group
Lienchi Merryweather, lider di grupo, a comenta cu normalmente nan tin hopi tempo nan ta deliberando riba esaki, pero nada concreto. Berdad un di e miembronan di un di e grouplidernan a puntra den e chatgroup cu nan tin kico lo bay pasa. Tin basta tempo caba cu a wordo bisa cu berdad e ta cay duro pa haci un carnaval na januari y februari, sabiendo cu Aruba y mundo henter ta den dje. Semper a bisa pa sigui’e paso pa paso pa wak kico lo bay pasa cu e virus aki.
Berdad Aruba no tin virus na e momentonan aki, pero nos no a habri ainda. Mayoria di e turistanan ta bin di paisnan cu tin e virus ainda. Ta keda bisa cu nan ta keda wak’e paso pa paso. Den e chatgroup di e Gruponan Uni a wordo bisa di parti di e presidente di SMAC cu el a sinta cu minister y ta wak riba e mesun pagina cu e gruponan tambe, cu ta den un crisis awor aki ainda pa pensa riba carnaval.
Fuera cu tin patrocinadornan cu gruponan ta depende riba nan, tur hende ta den un crisis. Awor aki en berdad, segun Merryweather, mester bay di acuerdo cu gobierno, cu e minister di cultura, pasobra con ta bay haci un carnaval y Aruba ta den un crisis. Despues a bisa cu probablemente e por ta un carnaval den zomer. Di hopi aña caba diferente comerciante ta boga p’e. Ora ta pidi sponsor di turismo durante e temporada, toch e hotelnan ta yen y nan tambe tabata puntra pa hala e carnaval pa juli.
Carnaval di parti di Merryweather por organis’e den cualkier momento. Ta bira cu aki tambe tin cu tuma decision. E aña aki ora cu gobierno a duna liber durante e siman di carnaval, el a haci su efecto. Tabata tin hopi hende, ora cu a ripara riba nan rooster di vakantie, cu tabata tin un periodo di un siman durante di carnaval, hopi a dicidi cu nan por bay 10 dia afo y nan a probecha di dje. Si e ta bay strob’e si of no, ta algo cu no ta problema pa purba. Merryweather no ta mira carnaval den januari of februari. Ta un bon oportunidad pa purba zomercarnaval con bon e lo bay. E ta cla pa cualkier opcion cu mester traha.
Con e lo afecta e grupo
Financieramente e no lo afecta e grupo. Merryweather a menciona cu prome cu esaki a wordo anuncia e tabata tin muestra di tela cu a bin caba pa su tema. No a inverti nada ainda den e carnaval. Bo por traha cun’e, pero financieramente no, pasobra bo no a haci nada ainda. Si haci’e juli otro aña, bo tin un aña pa prepare y dicidi si bo ta bay bek den grandi of ta brainstorm algo caminda e grupo por uni y haci algo mas chikito y pa 2022, bin bek den grandi pa carnaval di Aruba, dependiendo e sponsornan.
Pasobra sin sponsor no por haci’e. Ta depende tambe di gobierno pasobra, tin tur stakeholder cu tin cu yuda SMAC pa e por pone e carnaval riba caminda. Sin nan tampoco e no por bay. Bo ta un grupo di carnaval, pero bo mester cierto hendenan, manera polis, rode kruis, etc. Eynan mester di gobierno tambe pa yuda. Tin cu bay wak tambe con e situacion di Aruba ta. Carnaval tambe mester bay den e normal nobo. “Ban purb’e”, Lienchi a bisa. No ta algo cu a scoge pe, pero kisas e por bay resulta bon.
