Awe a drenta un peticion special na Minister di Husticia, mr. Andin Bikker, pa manda Polisnan di Aruba pa brinda sosten y pa por reforsa e Polisnan di Corsou cu ta atendiendo un situacion di disturbio riba caya, protesta y sakeo di tiendanan. Na nos isla ruman tin un situacion di descontento bou di un grupo den comunidad relaciona cu medidanan cu Gobierno a tuma rond relaciona cu Coronavirus.
Awe tardi nos a presencia salida di un ekipo di 30 Polis di Aruba, di e seccionnan di Team di Aresto, bou guia di Altoinspector Adrick Croes y di Mobiele Eenheid bou guia di Sub Inspector Humphrey Koolman. A sali den dos diferente vuelo, un cu 14 Polis y e di dos cu 16 Polis abordo. A nota cu a biaha cu tur nan ekiponan personal pa por eherce e trabou aki di maneha multitud durante un disturbio.
Pa e manifestantenan, lo no nota diferencia den actuacion policial pasobra e uniformnan ta mescos y bou di e helmnan blanco ningun hende lo por distingui cua Polis ta Arubiano y cua ta Yiu di Corsou. Hopi di nan, specialmente esunnan di AT, ta huramenta caba pa por traha na Corsou. Esey ta duna nan tur autoridad pa por eherce nan funcion na nos isla ruman.
Esaki no ta prome biaha cu e ekipo aki di Polisnan di ME ta sali pa brinda ayudo na nos islanan ruman. Den pasado a haci esaki tambe na Sint Maarten despues di horcan. Esaki ta por lo menos un di e bentahanan di tin e islanan cerca y di tin un tremendo cooperacion entre e cuerponan di Polis den e islanan mes. Specialmente e ekipo di AT sa biaha mas biaha pa Corsou y vice versa tambe.
Pa cuanto dia e Polisnan di Aruba lo “buta ordo” of “planta respet” na Corsou no ta conoci ainda. E situacion no ta parce di ta calmando, al contrario, cada dia ta sinti cu e antagonismo y poralisacion ta aumentando mas y mas. Fuentenan a sigura cu mariniernan na base militar Savaneta Kamp ta riba “stand by” pa un yamada na cualkier momento pa nan tambe activa y bay sostene nan coleganan na Corsou.