E situacion na Aruba ta hopi malo y Roy Tromp, ciudadano di San Nicolas, ta bisa cu nan mes no por come cu e entrada cu e ta ricibi di su pensioen. “Mi no sa con e actual generacion por sobrevivi,” el a bisa.
Lider di AVP Mike Eman y su team tabata dialuna mainta tempran na San Nicolas, unda ciudadanonan ta contact nan continuamente pa haci algo pa baha e Gobierno. E gastonan di famia a bira asina halto, cu hopi hende no por “come around” cu loke nan ta haya na entrada mensualmente.
Na encuentro teni na cas di Rudy Tromp, ruman di Roy, un cantidad grandi di persona a acudi pa mustra nan mal contento cu e situacion di gastonan cu a subi asina hopi na Aruba cu hopi famia ta den problema. Roy Tromp a conta cu antes e por a cumpra cuminda henter un luna p’e y su cas. Sinembargo awendia, e placa ta yega pa cumpra cuminda pa mita luna so. Cu su edad y malo, Tromp a haya su mes obliga di haci algun trabou pa rende e placa y trata di tin cuminda te cu e siguiente pago di pensioen. “Un cos so mi por bisa: Salba Aruba y laga Eman goberna.”
Mayoria di e hendenan grandi eybou a expresa di tin un preocupacion grandi cu desaroyo di prijsnan na Aruba. “Mi ta hopi triste cu e situacion, e hendenan ta pasando hamber. Hopi hende ta pasa miseria aki y no por ni sobrevivi cu e placa di pensioen so. Tur cos a bira hopi caro, y p’esey nos kier un cambio, pero un cambio hopi rapido. Nunca mi a mira un tristesa y miseria asina na Aruba,” tabata un di e comentario por a scucha.
Na e encuentro aki tambe tabata presente e politico di AVP Desiree de Sousa Croes, kende ta un ciudadano di pariba di brug. E ta bisa di por compronde e situacion di e habitantenan di pariba cu a wordo yuda hopi door di e Gobierno anterior. Awe sinembargo ta riba pan cu awa hopi di e hendenan aki ta biba. E criticanan aki ta scucha door di hendenan a vota pa e partidonan cu ta gobernando awo. “Nan ta bisabo cu nan ta sinti nan mes prizonero di e Gobierno aki. Riba pan cu awa nan ta bisa cu nan ta biba. Nan no por permiti nan mes nada extra cu ni full luna e placa di pensioen ta yega,” de Sousa Croes a expresa. E ta contento cu AVP a cuminsa drenta pueblo pa scucha nan dolor. “Scuchando dolor di pueblo so bo por maneha e pais aki. Awo no tin niun hende di Gobierno ta haciendo esey. E pueblo ta bisando “ta basta”, e abuso aki no por sigui mas. P’esey nos ta awe hunto cu pueblo pa nos pone un fin na e abuso,: e politico a expresa.
E mainta aki lider di partido berde Mike Eman a combersa cu ciudadanonan, a scucha nan dolornan y despues a reacciona mustra con e situacion di Aruba a binta deteriorando. A compaña e lider otro miembro di partido manera Mike de Meza, Marlon Sneek, Benny Sevinver, Desiree de Sousa Croes, Carl Giel y tambe Mervin Wyatt Ras, kende tin un curason hopi pa loke ta e aspectonan social, cu ta e ramo den cual el a traha prome cu el a drenta politica. E situacion t’asina malo, el a bisa, cu hopi mayor no por cumpra nada saludabel pa nan yiunan chikito. Prijsnan den supermercadonan t’asina halto, cu nan no por paga esaki. “Gobierno a tuma asina hopi medida cu comerciantenan dado momento a cuminsa hisa prijs y e situacion aki no por want’e mas, mientras cu ta sigui bini cu medida, faltando ainda “sugar tax”
Di otro banda e ta bisa cu e crisis plan di Gobierno ta funcionando y no ta ehecuta. “Pueblo por biba ora cu tin pan riba mesa, ora cu tin placa den cartera pa atende cu prome necesidadnan. Na e momentonan aki, e pueblo no tin esey. Esaki no ta conta solamente pa e hendenan humilde pero pa henter comunidad. P’esey bo ta sinti cu e hendenan ta cuminsa lanta, pasobra no por wanta mas.” El a recorda cu AVP y e lider semper a para banda di e hendenan den necesidad, ao ta para atrobe banda di e pueblo.” Y el a agrega cu e Gobierno mester cambia e rumbo, of bay y laga otronan cu si ta para banda di e pueblo dirigi e pais.”
