Manera mayor bo kier busca semper un bon luga (Kinderopvang) pa hiba bo yiu. Sinembargo, nos ta conta aki cu porcentahe bastante halto di persona cu no tin sikiera un diploma of certificado pa atende cu yiu di otro hende. E siman aki durante un rueda di prensa di Gobierno hunto cu colega Sue-Ann Ras, a anuncia cu e ley di centronan di cuido di mucha a bay na vigor.
Minister di Husticia y Asuntonan Social, Rocco Tjon, ta bisa cu esey mes ta indica e necesidad pakico mester a bini cu un ley y aworaki e ta na gobierno pa ahusta e situacion aki. “Mirando cu a permiti algo for di 1998 practicamente no tabata tin un ley. Eigenlijk prome cu esey caba tabata tin centronan di cuido pero na 1998 a cuminsa pensa riba e proceso pa reglamenta esaki.” Mirando henter e trayectorio di mas cu binti aña cu a permiti esaki, ta importante pa inverti den dje y brinda e espacio tambe pa e hendenan aki cumpli cu tur rekisito.
Gobierno lo yuda fortifica crèche cu mas conocemento
Gobierno ta bisa di lo bay haci tur cos den nan alcance pa asisti e lider- y trahadonan. Pasobra ta berdad cu kisas tin diferente lider di cuido di mucha, y trahadonan, cu por ta no tin e diploma di MBO 3 of 4. Pero durante e 18 pa 20 aña, nan a bay diferente cursonan. Esaki tambe lo tuma den consideracion hunto cu Inspectie Onderwijs pa acredita esakinan. “Kisas nan no tin e diploma pero nan tin e experiencia si. Durante tur e añanan aki nan a bay diferente curso pa bay haya e conocemento, p’esey mester brinda espacio y na mes momento bin cu un plan con bo lo percura pa tur centro di cuido cu bin acerca awor por cumpli. Hunto cu un plan cu bo lo yuda esunnan caba cu t’ey aworaki pa cumpli cu tur cos tambe.”
Tocante prijs di servicio
Na final di dia, nos tin un mercado liber y segun e mandatario encarga cu e asuntonan social, bo no por bay obstaculisa ningun hende pa loke ta e parti di prijs pa brinda e servicio. “Abo como mayor of cliente, bo ta cumpra un servicio, y mi sa cu tin e mocionnan den pasado den parlamento unda parlamentario Hendrik Tevreden a entrega esaki pa bin cu un Stadscreche, e ora bo por regula e prijs, pero aworaki e ta un mercado liber.”
Pa mas lesa TREMPAN.COM.
