Licetha Saragoza-Martinus, Presidente di Stichting Aquaspeed Bonaire Windsurfers, ta conta cu Bonaire Regatta su siguiente edicion, cu ta e di 56 edicion ta den ful preparacion. Openbare Lichaam Bonaire a acerca nan un bes mas pa organisa e actividad aki di Bonaire Regatta. Tin varios boto confirma for di hermana isla Corsou y ta sperando tambe for di Aruba pa confirma e totalidad di e participantenan pa loke ta e Regatta aki.
E COMIENSO DI BONAIRE REGATTA
Bonaire Regatta a cuminsa na aña 1968, unda inicialmente e tabata un competencia entre amigo pa competi den boto di piscado pa gana caha di cerbes, awo a bira un evento completo cu nos ta mira awe. “Esey ta e comienso di Regatta cual aworaki a bay completamente un otro rumbo. Sigur den e parti di participacion, e parti di boto miniatura cu ta algo otro tambe dunando chens pa hendenan bin cu talentonan nobo y traha nan mesun boto”, Martinus a expresa.
E INTERES T’EY AINDA
Martinus ta bisa cu den pasado esaki a trece hopi turista for di exterior, mas ainda ora di traha hopi cerca cu Venezuela, lastimamente cu hopi cos a cambia. Pero e oportunidad semper a keda habri pa traha cu otro organisacionnan internacional y te ainda Aruba cu Corsou ainda ta participando. “Esey ta pone cu e Regatta t’ey ainda, e interes pa participa den e parti acuatico t’ey ainda, anto aworaki ta mirando pa sa kico mas por haci pa trece bek na e isla cosnan nobo tambe.”
Pa bin wak Regatta na Bonaire mester cuminsa na wak e cupo di estadia y ticket pa por yega Bonaire. Ora cu tin actividad na Bonaire, tur cos ta yena hopi lihe, vooral riba e parti di ticket pa biaha pa e isla di Bonaire. Ta recomenda tur cu ta interesa pa bay, pa reserva nan ticket trempan pa bo por ta na Bonaire pa celebra e di 56 edicion aki.
Bonaire Regatta lo ranca sali pa 6 di october cu e parti di opening y tambe lo duna e chens pa windsurf, cual lo tuma luga dia 7 cu 8 di october, den bahia di Sorobon. Despues lo bay na Playa den bahia di Kralendijk, lo competi for di dia 12 te cu 14 di october, na unda lo finalisa cu entregamento di premio. “Nos ta invita ful pueblo di Aruba, hopi great si boso por yega cerca nos, vooral Aruba cu tin hopi boto miniatura cu ta forma parti di Regatta pa hopi aña caba. Nos ta spera di por mira boso”, Martinus a expresa.
TOCANTE BONAIRE REGATTA
Bonaire Regatta a cuminsa na aña 1968, unda eigenlijk un competencia entre amigo pa competi den boto di piscado pa gana caha di cerbes, a bira un evento completo cu nos ta mira awe. “Esey ta e comienso di Regatta cual aworaki a coi completamente un otro rumbo. Sigur den e parti di participacion, e parti di boto miniatura cu ta algo otro tambe dunando chens pa hendenan bini cu talentonan nobo y traha nan mesun boto.
