Den e ultimo dianan tabatin un temperatura halto di calor, unda cu no tabatin biento. Bureau Rampen Bestrijding Aruba (BRA) no a saca un advertencia pa tene cuidou cu calor excesivo, pa motibo cu e nivel tabata net net.
Rino Hermans, Director di BRA, a splica cu nan tin un maneho pa extreme weather (calor excesivo) y aunke ta sintie hopi, e no a yega na e parameternan pa asina nan saca un advertencia pa hende hidrata nan mes. E tabata fluctua, pero tabata sintie na 40. Den fin di siman a bin un momento di calmo.
Nan tin un parameter cu esey lo afecta salud y bida di hende conforme meteo su conseho. A base di esey BRA ta saca nan boletin pa persona corda hidrata nan mes, e bestianan na cas, pa wak p’e grandinan. Basa riba esey nan a maneh’e, pero e biaha aki e tabata net net na e rand y esey a haci cu nan no mester a saca advertencia. E tabata sofocante, biento a cay y tabata sinti e calor manera di 42 grado, pero nan a sigui e parameternan. BRA ta sigui monitor, pasobra e ta bay keda afecta nos durante e periodo aki.
Tur aña ta experencia e influencia aki, segun Hermans. Hopi biaha por mira cu BRA ta saca un advertencia pa hidrata y wak p’e bestianan. Incluso gobierno ta saca algo pa recorda hende cu tin calor excesivo y por influencia bida y salud di persona. E aña aki e nivel a yega net net. Nan a kere cu diadomingo ultimo nan lo mester a saca un advertencia, pero e no a yega e parameters pa haci esey.
Den desaster management tin peliger, risico, e zona di impacto y despues di traha e analisis, nan ta bin bek y bisa cu nan ta bay metiger. Den caso di calor excesivo nan ta metiger cu boletin y recorda hende cu ta bay experencia calor excesivo. Hopi biaha e boletin ta sali algun ora prome. Nan ta recorda tur hende pa cuida nan mes y hidrata.
E ta pidi pa corda riba e bestianan. Pasobra e ley di calamidad di BRA no ta papia di hende of bestia. Pero nan ta considera bestia tambe, pasobra nan tin bida.
