Diaranzon mainta durante e programa Nos Mainta na Telearuba Sra. Luz Marina Gonzalez (Rina) tabata un di e invitadonan.
El a papia di su experiencia cu e tin como Vicepresidente di e Hunta di Directiva di Quota International Inc. atendiendo reunion personalmente como tambe via “conference call” como parti di e “Board of Directors di Quota International, Incorporated”.
Rina Gonzalez ta forma parti di e Hunta di Directiva aki hunto cu hende muhernan di varios huki di mundo. Actualmente e Presidente di Quota International. Inc., Emilie Simon, ta procedente di Manila, Filipinas. E Tesorero, Carol Patin, ta procedente di Baton Rouge, Louisiana, Merca. E Vice President ta Luz Marina Gonzalez (Rina) di Aruba como tambe Brenda Cherry di Wooster di Ohio, Merca y Jan Rhodes di Papakura, New Zealand.
Desde 2018 Rina Gonzalez ta ocupa e funcion di Vicepresidente di e Hunta di Directiva di Quota Internacional, Inc. cual funcion e ta eherciendo cu hopi profesionalismo. Ela conta tambe cu actualmente e club di Aruba tin hopi voz den e organización aki internacionalmente pa motibo cu Aruba su miembronan ta ocupando funcionnan internacional cu tin derecho di voto. Normal ta cada Quota Club tin un voto di e presidente di nan club na momento di decisionnan importante pa e organizacion mundial aki.
Ela bisa tambe cu e prome miembro di Quota di Aruba cu a logra bira Presidente Internacional di Quota tabata sra. Enid Croes Marugg di Aruba como e pionero. Actualmente tin 4 persona cu tin derecho di voto procedente di Aruba, esakinan ta e Presidente di e Club di Aruba actual sra. Ivy Simon, e directora di Region 10, sra. Gwendeline van Trikt Rojer cu tambe ta di Aruba, expresidente International sra. Enid Croes Marugg, y sra. Rina Gonzalez mes cu ta e actual Vicepresidente di e organización internacional.
Quota Internacional Inc. tin mas di 200 clubnan rond mundo entre otro na Merca, Australia, Filipinas, India, Figi, Caribe, Europa y Canada.
Ademas di e diferente projectonan local na Aruba cu Quota International di Aruba ta desplega den comunidad y e logronan e club ta resalta den e organización riba tereno internacional ehecutivo.
“E club di Aruba ta uno hopi club fuerte internacionalmente, nos ta grandi den cantidad di miembro, den fundraising y donacionan. Tambe nos ta participa na programanan internacional por ehempel cu otro clubnan manera esun di Surinam (Struka Prisiri) cu ta stimula lesamento di buki. E otro projecto na Surnam cu e club di Aruba ta sostene ta “Muziekdoos” cu ta un programa pa promove educación musical/cultural como educación na e scolnan.”, asina Gonzalez a bisa.
Rina Gonzalez ta hopi contento y satisfecho di e trabaonan cu Quota International, Inc. ta eherce, cual organizacion a demostra di resalta den comunidadnan rond mundo pa 100 aña caba.
