Docentenan di Cacique Macuarima ta hopi feliz cu e reaccion cu nan a ricibi di comunidad, despues cu nan a bira victima di vandalismo den cual a cende candela na algun klas.
Henter e siman aki 24ora.com a bin ta suministrando informacion, no solamente riba e sucedido mes pero tambe riba e trabou cu mester sigui pa drecha e 4 lokaalnan cu a sufri daño pa e studiantenan por cuminsa ricibi les mas lihe posibel.
No solamente Gobierno pero instancianan di sector priva ta contribuyendo pa e scol por habri su portanan mas lihe bek pero mas cu tur cos cu e klasnan ta cla pa ricibi e studiantenan. A haci e trabou di limpiesa door di Bomberonan boluntario y algun otro persona mas, inclusive ex alumnonan. Tambe por a mira mayornan cu yiunan dunando un man.
E luga ta di tal manera cu nan ta cuminsa bek dialuna awo cu 9 lokaal (a hinca un klas den e computer lokaal) y tres klas ta ubica na Colegio Santa Famia na Pos Chiquito y e di tres klas ta Colegio Laura Wernet Paskel. Tur e muchanan ta wordo transport den bus pa e otro scolnan durante algun luna.
Pero mientrastanto a cuminsa haya diferente donacion. Diabierna mainta Ricky Croes y esposa di Dyon Center a haci entrega di un donacion di 2 mil florin na material. Normalmente e docentenan ta cumpra material na Dyon Center caba.
Un dia prome Big Mama Grill di sr. Raven, a haci un donacion di 3 mil florin, AMC Unicon a haci entrega di airco, SETAR di su banda a haci un donacion di 5 mil florin, pero tambe tin un app di pay.aw via cual e comunidad por haci un donacion den forma hopi mas facil.
Kico awo
Arkitectonan di DOW tambe a haci un inspeccion caba di e daño sufri. Mirando cu e candela a core den e dak yega te na e baño di mucha muhe, e ta encera cu mester baha e dak completo. Pues e ta un trabou di basta luna, unda cu blafon tambe mester cambia.
Directora sra. Bailey ta den combersacion cu compania di seguro pa caba cu e rapport mas lihe posibel, pa por cuminsa cu e trabounan. Loke por bisa ta cu e daño ta basta grandi y e gastonan lo tya basta grandi.
