Tabata tin un delegacion di tanto Aruba, Boneiro y Corsou, como tambe e embahada Hulandes na Caracas, a reuni cu autoridad Venezolano, a yega na cierto acuerdonan. Manera tur hende sa, e botonan di fruta a cuminsa yega Aruba, segun director di Douane, Ricky Croes.
Siman pasa tabata tin un barco cu a yega cu basta fruta. Tabata tin hopi speculacion den media, diferente hendenan tabata papia cierto cosnan. A sinta cu e comision di Grens Opening Venezuela y eynan a evalua tur cos un biaha mas y mira kico ta e acuerdonan cu a wordo traha. Ta importante pa bisa cu den e caso di e tardansa cu tabata tin siman pasa cu bahamento di fruta, tin di haber cu e barco mes. E forma con e barco tabata carga, unda cu tur e milonnan, papayanan, e fruta tabata den e barco, uno uno mester a wordo saca y no tabata den caha. Cu e barco a tarda pa saca su frutanan, tin mas di haber cu e barco cu tin di haber cu e controlnan cu ta wordo eherce na Aruba mes. Douane su papelnan tabata cla tempran. E papelnan a yega tempran. Tur cos a wordo controla, pero e forma con e tripulantenan tabata saca fruta for di den e barco a tarda y a haci cu e personanan cu mester a busca nan fruta, a haya nan fruta mas laat.
Tambe a hunga un rol e hecho cu e persona cu a bestel e frutanan, tabata di tempran eynan, pero e frutanan a wordo saca sin cu tabata tin un bon reparticion ken su fruta ta wordo saca prome. Por lo tanto hopi hende mester a warda demasiado, sin cu nan por a drenta pa busca nan frutanan.
Segun Croes, Douane ta haciendo su controlnan bon. Despues cu e acuerdonan a wordo traha cu Venezuela, tin e controlnan aki. Venezuela tambe ta contento cu e manera cu Aruba ta haciendo su trabao. A papia e manera cu ta wordo haci. Ta un win win situation y di awor padilanti frutanan por drenta. Tur otro producto tambe por drenta y esakinan lo wordo someti na e mesun regimen cu tin awor aki cu fruta.
Por bisa cu e carganan por cuminsa drenta y tur cos lo wordo someti na e controlnan manera cu tin’e planea. E controlnan ta algo bon pa Aruba mes.
Cambionan
Di parti di Douane, no tin ningun cambio den e sentido cu e controlnan ta wordo haci manera e tabata. Pero si a yega na afspraaknan cu Venezuela unda cu nan ta manda tur documentacion cu tin mester pa asina controla bon. Locual a wordo haci ta e control a wordo poni na Venezuela. Nan tin cu percura pa tur cos ta legal y na Aruba ta verifica. Una bes cu verifica cu tur cos ta bon, ta sali for di e punto di bista cu e productonan ta ok pa sali di Venezuela y por laga nan bay.
Otro productonan
Segun Croes, despues cu a caba di reuni, a papia riba tur e otro posibilidadnan. Te hasta nan a papia di trece carne y cabrito. Pero no a papia di nan pasobra e tin di haber cu otro departmento. Pero awor aki tur producto por drenta.
Reglanan
Douane ta mira cu nan ta mandando tur e documentacionnan cu ta pidi y una bes cu mira cu aki falta algo, tin contacto. Awor aki tin contactonan mas estrecho y via capitania de puerto nan ta controla di biaha y manda tur e documentonan pa puntra si ta OK. Nan ta contest cu si y tur cos ta bay e ora.
Pre-screening
Awor aki ta haya e pre arrival. Ta manda e documentonan di tempran. Capitania de puerto ta manda tur cos pa controla tempran. E proceso na Aruba ta cu ta pasa prome na Directie Scheepvaart, pa nan haci nan control y si e no ta ok e barco tin cu bay bek. Despues di esey ta bin e parti di Havenbeheerder, Imigracion y despues Douane. Den e secuencia ey ta wak pa tur cos cuadra y ta haya cu e parti di sanidad tambe tin di bin controla si tur cos ta ok pa loke ta trata fruta, berdura y e piscanan.
Tipo di Embarcacion
Directie Scheepvaart ta esnan cu ta wak e tipo di embarcacion y tambe e zeevaardigheid di dje. Si nan ta cumpli cu tur e rekisitonan cu tin cu cumpli cu nan. Di un otro banda a bin un decreto cu ta bisa cu no ta bay acepta mas peñero of botonan habri, lancha, pasobra esakinan no ta wordo considera como un barco di carga.
Pa loke ta trata koper, a bin un decreto riba dje. Pa loke ta trata oro, tin un maneho di Ministerio Publico riba dje. Awor aki e control ta wordo haci na Venezuela. Loke ta haya aki tin mester di su documentacion necesario. Ta controla bek cu Venezuela si tur documentacion ta cuadra, si nan ta legal. Y una bes cu eseynan ta bon, tin cu laga nan bay pasobra nan a sali legal for di Venezuela.
Kico mas ta pendiente
Segun Ricky Croes, den nan comision nan ta sinta constantemente y lo evalua con e situacion ta. Con tur cos ta bayendo y pa wak unda mester drecha of cambia. Di un otro banda tambe, nan a ofrece Boneiro si en caso tin un otro reunion. No a stipula fecha ni punto di agenda, pero pa un proximo reunion na Boneiro e lo tuma luga.
Reglanan
E prome fout cu tabata tin cu e barco diabierna, ta cu el a pega riba santo na Venezuela mes. El a keda pega eynan pa cuater ora mas of menos, prome cu e por a sali bin Aruba. Despues tabata tin e carga cu tabata gestort den e barco. Pa nan por a sak’e a tarda hopi. Douane no por pone regla pa con nan ta carga nan barco, pero ta keda na nan mes pa wak kico nan ta haci y con ta haci nan trabao mas eficiente.
Segun Croes, lo bay tin miho control. Ta bay verifica, pero si por sali for di punto di bista cu tur cos ta bon controla pasobra ta haya tur cos for di antemano. E rol e ora ta djis pa verifica si tur cos ta cuadra. Pa tur loke ta e otro partnernan den e parti maritimo, e controlnan cu ta wordo haci tur es tempo, ta pa haci un bon analisis, manera cu tabata haci’e y awor aki ta stipula poco regla cu nos por proteha nos isla miho. Tanto pa loke ta parti laboral, parti di douane, parti di imigracion, parti di siguridad. All in all, a logra di pone un bon control na tur e partinan aki na Aruba, Croes a finalisa.
