Hospital tabatin un siman bastante ocupa cu bishita di Zuyd Hogeschool na Aruba. A atende cu e tema di haci un estudio na Aruba unda cu a organisa varios reunion cu sigur un 50 empleado y funcionario di Hospital haciendo un “colegiale raadpleging”.
A repasa e procesonan y con Hospital ta maneha e asunto di estudio pa educa y desaroya su empleadonan.
Director di Cuido di Hospital, sr. Ezzard Cilié a duna di conoce cu a ricibi bishita di e Universidad di Hulanda cu tabatin e tarea di screen Hospital riba e necesidad cu tin pa estudio di “verpleegkunde”. Tambe kico Hospital tin cu tene cuenta cune y kico mester considera pa e siguiente 10 añanan den e profesion di enfermeria. Ta conoci cu Hospital tin un escasez grandi di verpleegkundigen, p’esey a pidi pa haci un investigacion y duna un conseho riba ki nivel di verpleegkunde tin awo y alabes locual Hospital ta bay tin mester den futuro.
Poco tempo ey Hospital a cera e prome acuerdo cu Colegio EPI cu e intencion pa intensifica y eleva esaki, asina sr. Cilié a duna di conoce. Awo lo sigui cu e parti di specialisacion na Zuyd Hogeschool cu lo acesora Hospital hunto cu Universidad di Aruba pa un nivel mas halto y specialisacion. Esaki ta bay un tiki mas leu di locual Hospital a cuminsa cune, cu tabata un educacion basico di “verpleegkunde”. Di Hospital lo saca candidatonan potencial pa sigui e estudio mas eleva.
Esaki ta nifica cu hobennan Arubiano tin hopi mas oportunidad si nan bay via Hospital, cu ta cla pa ofrece un cantidad di opcionnan di estudio, anto na Aruba mes, sin cu mester biaha of bay studia afo pa tempo largo. Hospital mes lo no haci e parti di educacion, sino Universidad di Aruba cu lo traha cu Hogeschool Zuyd. Hospital ta contento pasobra ta duna studiantenan di Aruba cu a termina nan estudio un chens di specialisa na Aruba mes y pues no mester bay afo. Nan por sigui aki y yega te na un “Master Degree”.
Sr. Raymond Clement, Director di e Facultad di “Gezondheidszorg” na Zuyd Hogeschool di Hulanda, a sigura di a ricibi y evalua hopi informacion durante e bishita. Un di e aspectonan positivo ta cu e educacion di Aruba cu Hulanda ta parecido y tin hopi desafio comun. E ta contento di a cera conoci cu e oportunidadnan y e retonan pa asina e representantenan di Zuyd Hogeschool por duna un miho recomendacion.
Un di e realidadnan cu e grupo ta regresa Hulanda cune ta e desafio den e industria di salubridad, specialmente e interes limita den hobennan pa sigui studia den e ramo di enfermeria. Di otro banda nan ta cuidando pashentnan cu enfermedadnan complica, esta “complexe patiëntenzorg”, cu multi mobilidad y cu diferente enfermedad pareu. Esaki ta nifica cu mester educa otro tipo di verpleegkunde y no solamente esunnan cu sa hopi di e funcion y diagnostico, pero tambe verpleegkundigen cu por traha bon cu otro, cu ta creativo, “ondernemend” y specialmente por traha “interprofesioneel”, asina el a duna di conoce.
Durante e bishita aki tur partner a sinta hunto pa mira con por logra mas cooperacion, di cual Colegio EPI y Universidad di Aruba ta stakeholders importante y unda cu e rol di Hospital ta esencial, debi na nan conocemento di diferente diagnostico pero tambe di cooperacion cu diferente institutonan educativo. Ambos minister di Educacion y Salud ta sostene e iniciativa aki y ta keda pendiente di e resultado.
