Durante conferencia di prensa e lider di partido RED Democratico a expresa cu nan ta e unico partido cu a sa di demostra integridad ora cu nan a forma parti di gobierno.
Ricardo Croes, lider di RED Democratico, a reacciona no mucho contento riba e pregunta dje color politiconan cu a goberna y hende no sa ken pa confia. El a indica cu a haci un comparacion y e ta mal haci. E ta haya cu no mester compara su partido cu esun geel y berde. Croes a sigui bisa pa no compar’e cu POR tampoco, pasobra e lider, e minister cu no ta sospechoso ta bou di investigacion y djis aki tin un caso den corte.
El a sigui indica cu den dos aña di gobernacion di MEP-POR-RED hopi hende a bisa cu Ricardo mester a manda gobierno cas, pero e no por a haci esey. Croes ta keda para ariba cu partido RED Democratico ta e unico cu a demostra integridad. El a indica cu lider di MAS ta bou di investigacion y mester warda con cos ta bay sali. Pero prome cu nan a drenta parlamento, entre nan cu nan a kibra acuerdo, pasobra e mucha muhe cu mester a drenta parlamento no t’ey, asina Croes a expresa.
Pa loke ta RED, Croes su minister integro ta Rudy Lampe. Loke nan a haci tabata mustra integridad y no simplemente un palabra den diccionario, di cual el a duna RAIZ como ehempel. Segun Croes, na 2017 el a bisa cu RAIZ ta di bringamosa y esey ta loke por mira. E ta haya cu no mester compara nan, pasobra RED a mustra responsabilidad financiero, maneho financiero, vision, incluso a bin cu pilar economico.
