Republica Dominicana a celebra su 175 aña di Independencia y aki na Aruba, Fundacion Dominicana Arubaanse Juan Pablo Duarte, a sa di celebra esaki cu varios actividad.
Segun su presidente, Winston Tavares, nan ta celebrando e hecho aki ya pa 13 aña, na Riu Hotel. Ta gradici gerencia di e hotel cu a pone e local disponibel pa e fundacion por haci su actividad di independiencia, cual awe nochi lo tuma luga tambe.
A sa di organisa diferente actividad pa diferente meta. Ta pa e motibo aki mes ta acerca e comunidad Dominicana na Aruba, pa apoya e fundacion.
Un cos particular cu e fundacion ta haci ta, cubri gastonan di entiero di un miembro. Apart di esey nan ta haci otro actividadnan social, por ehempel yuda hendenan cu pasashi, cu nan kier regresa nan pais bek. Damanan cu ta na estado, por ehempel. Nunca ta bisa hendenan cu no, y cu atrabes di e meta, nan ta cumpli cu esey.
E comunidad Dominicano ta grandi riba e isla. Tin aproximadamente 6500 persona cu ta miembro di e comunidad. Pero e fundacion mes tin registra mas of menos 500 persona.
Di e 500 persona cu tin registra, un 70 persona ta contribui cu e fundacion.
Ta haci un apelacion na e comunidad Dominicano, apoya e fundacion, ya cu e fundacion a cumpli cu su derecho di existencia y tin cu haci’e como un reflexion tambe pa nan wak e importancia di e fundacion.
Metanan pa 2019
Segun Tavares, nan tin hopi meta pendiente. Nan ta bezig cambiendo nan structura. A pone un persona na e fundacion Dominicano, for di 2’or y mey pa 6’or y mey di atardi, di dialuna pa diabierna, pa esnan cu kier inscribi of busca mas informacion, por bay eynan y busca mas informacion y tambe sa mas di e otro servicionan cu e fundacion ta ofrece, Tavares a termina bisando.
