Dia 21 di Januari ultimo, Ceque College MAVO a tene un dia di conscientisacion pa e alumnonan di 1e y 2e klas. E instancianan invita tabata Famia Planea Aruba, Korps Politie Aruba y Fundacion AntiDroga Aruba.
Organisacion di e dia educativo aki a bay estilo carousel. Cada klas a pasa cerca un instancia, tabatin 4 klas di 1e y 2 klas di 2e. Pues cada klas a haya tur e informacion necesario cerca cada instancia.
Mirando e echo cu Carnaval tin su parti bon y su parti menos bon, Ceque College MAVO a haya cu ta importante pa conscientisa nos hobennan tocante: alcohol y droga, sin laga afo nan comportacion durante e eventonan. E instancianan a trece diferente material visual, cu e hobennan por ta mas consciente di cierto situacion cu por hinca nan den problema of tranca nan estudio.
Tambe a haci diferente tarea estilo wega, pa asina e informacion tabata mas comprendibel y interesante. Ademas e instancianan a percura pa un bon splicacion, cu a resulta cu tabatin hopi interaccion y pregunta, pues e mensahe a yega! Directiva di Ceque College MAVO ta gradici e 3 instancianan pa nan bon trabou y cooperacion, brindando nos hobennan bon splicacion pa preveni nan pa cay den problema.
