Den e dianan aki tin dos caso serio cu a tuma luga, envolviendo dos hoben. E idea no ta pa pone un stempel riba e dos hobennan aki. Seraida Pemberton-Leonard, directora di Stichting Reclassering & Jeugdbescherming Aruba, a splica cu ora tin casonan asina, ta yama nan pa por haci un rapport riba e hoben, den sentido cu ta haci un investigacion di e circunstancianan personal di e hoben, su situacion na cas, na scol, su tempo liber.
Full un investigacion, cu por duna un idea, un bista, den e ambiente cu e hoben ta, kico a pasa den su situacion y kico a conduci cu el a comete e delito. Ta purba di haci esey den e prome cinco dianan di detencion, pa asina por yuda e fiscal tuma un decision mas balansa den e caso.
Un promedio di 80 pa 100 hoben a keda registra na Reclassering pa comete un delito anualmente.
Aña pasa si tabata tin un drop. A haya 62 hoben cu a registra, di cual 34 ta first offenders. E promedio di first offenders ta entre 30 pa 40. Pero e registro ta entre 80 y 100. Esey ta nifica cu tin basta hoben cu ta ripiti y ta cay cera pa aña.
Bao di nos hobennan ta riparando den e ultimo añanan crimennan hopi pisa. Den pasado tabata wak mas crimen manera hortamento di bicicleta, bringamento riba caya. Pero awo ta papiando di realmente asesinato, trafico di droga. Delitonan cu tabata haya mas bao di hendenan adulto, awo ta cay bao di e hobennan.
Segun Pemberton, hopi factor ta hunga un rol den bida. Hubentud awor aki ta haya hopi influencia di tur banda. Si wak awor aki tin e situacion di COVID, tin hopi tension den e circulo familiar. E hecho cu no por sali mas, e situacion financiero, e situacion di no tin e libertad di sali manera cu tabata kier.
Hopi cos ta hunga un rol, hopi desaroyo cu ta bin di afo, ta influenciando nos hobennan cu mas y mas ta wak cu criminalidad di e hobennan ta bayendo den otro rumbo, cual ta esun negativo.
Pemberton ta sigui splica cu tur crimen ta riba su mes, cu ta wak tur circunstancianan den cual un persona, un hoben den e caso aki, ta wak kico ta causa cu e por comete un crimen. Locual si ta haci, mirando cu ta haciendo investigacion di tur hoben cu cay cera, por saca locual ta yama factornan criminologico, cu ta causa cu un hoben ta cay cera.
Loke a ripara cu den e ultimo temponan, number 1, ta tempo liber. Esta cu hobennan no tin hopi cos pa haci den nan tempo liber. Pa esey, nan ta frustra y ta bay haci otro cosnan negativo.
Tambe peer pressure ta hunga un rol. Esta e circulo di amistad cu nan tin ta influencia otro den un forma negativo toch. No por bisa cu ta trata di un factor so.
Ta midi cuanto factor criminologico tin den un caso y den un caso por tin uno, pero den un otro caso por tin mas cu dies.
Pa esunnan cu tin mas cu dies, por mira cu e señalnan ta mas presente cu hende por wak e chens cu e hoben aki por cay den man di husticia ta hopi grandi. No por bisa cu pasobra ta mira cierto factornan, ta esey ta e causa.
Na momento cu e hoben cay cera, manera bisa anteriormente, ta indica nan na Reclassering. Ta haci un investigacion. Polis caba ta traha un procesverbaal y e ora ey e fiscal ta bay evalua e seriedad di e caso cu por a causa y kico ta acusa e hoben. E ora ta hiba e caso corte. Mirando cu nan ta menor di edad ta aplica e ley “Jeugdstrafrecht”, dependiendo e edad, si tin e edad di 17/18 aña, teniendo cuenta cu e peso di e crimen, por procesa e caso como un adulto. Pero esey tur awor aki ta mucho tempran pa bisa pasobra ainda e investigacion ta andando.
Awor aki ta ainda den e situacion di COVID, cu ta pone un peso hopi grandi riba nos famianan, riba nos tatanan di famia, mamanan di famia y tambe riba e hobennan, segun Pemberton.
Awor aki tin cu enfoca, apesar no obstante e situacion, kico si ta e cosnan positivo por sali di dje. Den e proximo temponan cu ta bin, Reclassering ta bay cuminsa duna hopi mas informacion riba con pa anda cu situacionnan dificil awor aki y kico ta e cosnan positivo cu por saca di dje, pa minimalisa e tension cu tin riba famianan awor aki y con pa haci cambio y wak y preveni cu cosnan sali fo’i man.
