Departamento di Cultura Aruba bou di auspicio di Ministerio di Cultura y cu sosten di Funadacion di Corector Papiamento, ta organisa for di 2009 e proyecto anual Arte di Palabra. Arte di Palabra ta un competencia literario na Papiamento pa scolnan secundario y avansa.
E competencia di Arte di Palabra 2021 ta tuma luga dia 6 di maart na Cas di Cultura.
Skirbimento creativo ta un instrumento valioso di enseñansa di idioma materno, pa motibo cu e ta aporta na desaroyo emocional y cognitivo di e hoben den desaroyo.
Skirbimento creativo ta yuda e hoben descubri su mes, siña con pa expresa su mes y su sentimentonan, banda di laga e hoben ta activo cu literatura y lesamento na un manera spontaneo.
Den caso di Arte di Palabra, prosa (cuenta) y poesia (poema) ta e dos generonan literario cu ta central den e competencia, den cual na un manera dinamico ta expone un obra skirbi creativamente.
Poesia
A. Poesia existente, obra di otro autor; alumno di klas 1 y 2
B. Poesia original, skirbi pa e alumno mes; alumno di klas 1 y 2
C. Poesia original, skirbi pa e alumno mes; alumno di klas 3 – 6 / EPI
Cuenta cortico (maximalmente 1 A4)
D Cuenta existente, obra di otro autor; alumno di klas 1 y 2
E. Cuenta original, skirbi pa e alumno mes; alumno di klas 1 y 2
F. Cuenta original, skirbi pa e alumno mes; alumno di klas 3 – 6 / EPI
Di e forma aki Arte di Palabra ta duna balor na nos idioma Papiamento den scol pa medio di literatura di hoben pa hoben. Cada tanto tempo ta amplia e categorianan mas purbando asina na duna mas hoben e posibilidad pa participa den e competencia.
Algun aña atras a haci esaki cu e categoria di Haiku y awo ta bay haci esaki cu Rap.
Ya tabatin un biaha caba cu algun hoben espontaneamente a skirbi un Rap pa participa den e competencia. Na e momento ey e competencia mes no tabatin e categoria Rap, pues e opcion mas factibel tabata pa laga e Rap forma parti di e categoria di poesia original.
Danki na e desaroyo tecnologico cu tambe a aporta na nos competencia, awo si por tin Rap bek den Arte di Palabra y como un categoria riba su mes. Rap, un categoria nobo, cu no ta nada mas cu un forma liber di expresion di opinion y/of huicio via di ritmo uzando generalmente frase cu ta rima.
