Marcel Balootje: Nos mesa, un luga di honor y union

133

Ta parce manera esaki no ta un lugar di importancia mas, y ta e prome lugar den un hogar caminda bo ta nota e presencia di obedencia y respet.

Bo por puntra cualquier  mucha  of mayor cual ta e ultimo biaha cu bo a sinta come na mesa hunto cu henter famia, y hopi biaha nan no ta corda.

Pasobra mesa den cas no ta solamente un mueble pero e ta un lugar di encuentro pa famia, un lugar di honor, respet, obedencia, communion y union.

Laga nos recorda cu Ultima Cena a tuma lugar na un mesa, caminda Hesus a duna instruccion kico ta bay pasa cune y e Disipulonan.Mateo 26 vers 17-30 ,Juan 13 vers 1 -30.

Den nos hogar nos mesa ta masha importante, ora nos tur acudi na mesa, pone TELEFON un banda, sea bo ta pone riba silent of riba off, y tuma tempo pa bo famia, cu respet dilanti di Dios. Na mesa no ta un lugar pa discuti, ni tampoco zundra, pero ta un lugar di amor, camimda nos ta comparti, cuminda cu otro, caminda un yiu por pidi su tata of mama e pida carni  cu tin den su tayo, caminda un yiu no a come tur cu cuminda y su tata , mama, of ruman , ta tume y come e sobra sin ningun tipo di berguensa of rechaso, caminda tur hende por wak otro den cara y pone tur diferencia di opnion un banda, pasobra nos ta na mesa.

E ehempel ta cuminsa na e mayor, caminda e tata of mama ta sirbi e cuminda, despues oracion ta wordo haci pa yama Dios danki pa e cuminda , y danki tambe pa e man cu a cushina riba e dia ey, y semper despues di come duna compliment na esun cu a cushina.

Prome sintoma di desunion den famia ta cuminsa na mesa, pasobra sikiera un biaha pa dia un famia mester por sinta huntu na mesa y come, si un mucha no por sinta na mesa huntu su mayornan y come tin algo cu no ta bon.

Si Papai y Mamai no por sinta na mesa huntu anto cos a bay hopi for di man, si  mesa bira un lugar pa discuti tocante placa na ora di come nos ta riba e caminda robez.

Mesa no ta e lugar pa zundra un mucha ora e ta come, ni tampoco bini cu reclamo tocante di scol na es momento.

Pa motibo cu nos no ta reuni mas na mesa, nos ta perde contacto familiar, y ora nos ripara esey tin biaha ta laat, pasobra e mesa ta mes esencial cu auto, nos ta kere hopi biaha cu tur cos por papia den auto, na caminda pa trabao of pa scol, pero tin cosnan instruccion di bida cu mester wordo duna na nos yiunan, conseho valido pa nan crecemento, cu nos por usa e mesa, pa comparti esey.

Awendia tur hende ta riba na telefon, pero nos ta lubida, cu amor displina, coreccion, no ta pasa via di telefon, ta personal e mester sosode, nos no por stima pa medio di un app, ni tampoco pordona pa medio di un app, pasobra awendia tur cos ta un app, pero e calor di mayor, y e amor cu bo yiu mester no por bay virtual.

Awendia mayoria meeting ta virtual usando Coronavirus como e motibo principal.Pero  ta imposibel sinti e necesidad di un curazon den un reunion virtual. Nos ta rogabo den nomber di Cristo Hesus, pueblo lesa y scucha bon, no laga bo famia bira un famia virtual, caminda tur cos ta riba app, paso e amor di Dios no ta pasa di mayor pa yiu via app. Haci esfuerso pa mantene bo famia hunto, wak pa sikiera un biaha pa dia tur hende ta na mesa, y si ta falta un persona e motibo mester ta hopi valido , pa e no tey. No tuma excusa barata, cu mi no tin gana di come , of mi ta wardando un yamada. Nos mesa ta e lugar di Famia y Honor den nos cas. Corda cu e bon structura di Famia  Cristian ta: DIOS, FAMIA, IGLESIA, TRABAO, ESTUDIO ,DEPORTE, ETC ETC.

Ban bek na mesa den nos hogar, pasobra ta eynan nos ta topa cu nos mes, nos yiunan, y asina nos por guianan den e caminda di Dios. Efesios 6 vers 4.

Sinceramente

Pastor

Marcel Balootje.