Luna di juni ta conoci pa celebracion di “Pride Month” of di derechonan di LGBT. Aki na Aruba aki aya tambe sa tene actividad pero no asina hopi manera esnan di e comunidad LGBT mes ta desea. A combersa cu Raizha Jansen, kende a nace como un persona di genero masculino, den cual a sinti su mes atrapa ya cu e tabata desea di ta un hende muhe.
Den un combersacion largo cu Raizha el a conta cu el a cuminsa sinti su mes diferente basta laat den bida, rond di su 17 aña. El a cuminsa haci su mes pregunta di con e ta wak direccion di hende homber, di su mesun sexo. “Mi a puntra mi ruman di con mi atencion ta riba hende homber y su contesta mesora tabata “pasobra bo ta gay”. “
E tempo ey cu tabata mas o menos 25 aña pasa, esaki tabata un tema tabu cu no por a combersa cu mayornan riba dje.
Tabata tempo cu el a bay haci curso di peluqueria y maquiyahe na Maracaibo, el a topa cu hopi hende di e comunidad gay y a mira hopi transgender. “Mi a pensa mesora, esaki ta loke ami kier.” Asina cu el a yega Aruba, el a papia cu su mama y a bis’e cu e kier ta un hende muhe y cu e lo bay haci e cambionan necesario den futuro. Aki na Aruba tabatin transgender, pero nan a dicidi di bay biba den exterior pasobra aki nan no ta logra haci nan bida.
Asina poco-poco el a cuminsa cu e cambio y cu e intencion pa e si keda biba riba su isla. Pero tabata apenas 9 aña pasa el a cuminsa cu e operacionnan necesario cu te awo a yega 11.
E ta e di dos persona cu tin un paspoort unda a cambia e nomber di uno di homber pa uno di muhe. El a nace como Rodney Jansen y awo e ta Raizha (nomber di su wela) Jansen. Mester a cumpli cu algun regla prome cu autoridadnan bay di acuerdo cu e cambio, entre otro cu e mester ta tuma pildo di hormoon. Pa cambia su sexo den e paspoort no ta importante. Mas importante tabata pa cambia su nomber pa cumpli cu su fisico.
Raizha ta corda cu e cambio na su trabou y den amistadnan no a cay den bon tera. E tabata prepara pa e hecho cu no ta tur hende lo a acepta esaki. “Mi ta contento cu ami por acepta mi mes. Esey ta mas importante,” el a bisa.
Apesar cu e hendenan awe ta mas habri, semper lo keda cu e señalamento di “e”. “Nos tur ta hende, nos tur tin nomber. Nos no a nace pa cay na agrado di hende. Mester papia na scolnan cu tin mas genero, no solamente homber y muhe.”
