Pueblo a papia y a bisa kico nan ta pensa riba e cantidad di casonan di coronavirus. Di berdad ta muestra di preocupacion ora cu nos a combersa cu varios ciudadano, kendenan a duna nan punto di bista, kico ta loke mester haci pa por caba cu e fenomeno aki riba nos dushi isla.
Mario Thiel ta un hende grandi y a comenta cu mester implementa algo mas duro. Sigur un lockdown di 24 ora mester ta na su luga pa asina e cantidad di casonan cu tin na Aruba. Mester tin un manera pa esaki por baha. E no ta bay asina facil tampoco, e ta fastioso.
Naturalmente pa e hendenan mas grandi ta dificil y peligroso.
Un otro ciudadano, Suzanne Gara, a comenta cu si e tabata gobierno, mester practica distancia social. Tambe mester di intervencion. Tur hende mester bisti mondkapje. E ta pensa tambe mester ta mas estricto cu barnan, mirando e cantidad di hendenan cu ta bay bebe. Nan no ta tene cuenta cu distancia social.
Pa awor aki gobierno ta haciendo un bon trabao y no ta necesario pa bin cu un lockdown of un toque de queda 24/7. Ta e hendenan mester ta mas responsabel cu nan mes.
Ilaisha McDougal ta pensa cu si e tabata forma parti di crisisteam, of gobierno, mirando e situacion di coronavirus si e bay fo’i man, e lo atende manera e prome biaha. Esey a bay hopi mas miho compara cu awo.
Placa no ta tur cos, segun McDougal. Si a haci’e na e manera cu a haci’e na prome instante, por ta e lo tabata un tiki miserabel pa pueblo, pero toch nos lo tabata mas safe.
Pa awor aki, e ta pensa cu mester bay bek manera e prome lunanan di e prome ola di e pandemia. Sra. Sanchez ta pensa cu e situacion ta malo den corto bisa. Pasobra no tin placa, no tin trabao.
Albert Angela, ta chauffeur di B-19 y e ta pensa cu gobierno mester pone un luga special pa esnan cu ya ta contagia caba. Esunnan mester bay den cuarentena tin cu ta apart. Si nan bay na nan cas mes, nan no ta mantene nan mes na e reglanan. Nan ta bay desvia di esakinan. E ora ey cos ta bay fo’i man. Gobierno mester pone un luga special pa esaki.
Como chauffeur di autobus, e pandemia aki tin su retonan. No ta transportando suficiente hende manera antes y e situacion a dal nan duro. Tur dia nan tin cu yama atencion di pasaheronan como si fuera ta mucha chikito nan ta. Ta trata aki di hendenan grandi cu mester sa cu e cos aki ta serio.
Angela tin cu cuida su mes y su pasaheronan pa cos no bay fo’i man. Pero tur dia mester yama nan atencion pa pone tapa boca na nanishi y boca. Ta un situacion hopi estresante.
E protocol ta bon. Loke ta pasa cu si no tin control, pa e cos bay mas miho, mester di un control riba bus y e pasaheronan, pa wak con e busnan ta. Pa e chauffeurnan tin nan tapa boc, nan handsanitizer y cu e pasaheronan tambe mester tin. Nan ta sinta y nan ta coy e tapa boca bah’e. Hopi di e pasaheronan no ta mantene nan mes na regla. Nan ta cana drenta sin e tapa boca. Angela ta indica na nan cu e regla ta cu tin cu bisti’e pafo prome cu drenta. Ta tur dia esaki ta tuma luga. Tin algun hende hopi disciplina. Nan ta wak e bus ta bin di leu, ta saca e man y manera e bus ta yega cerca, ta bisti nan tapa boca. Pero tin di nan no. E ta bira fastioso y stressfull pa e chauffeurnan di bus.
Troy Lee ta un otro ciudadano kende a opina cu coronavirus ta afecta tur hende. Tur hende pasa door di dje. E gobierno ta haci loke nan por rond mundo mes. Awor aki mes Aruba ta purbando pa baha e cantidad di casonan. Si sigui manera cu ta, por logra baha e cifra di e casonan.
