E situacion actual na Aruba ainda no ta loke e mester ta y nos ta trahando hopi duro tumando accionan concreto pa esaki por cambia hopi lihe. Esaki ta bira e di 7 siman desde cu Aruba a haya e prome contagionan dia 4 augustus.
Minister Dangui Oduber, encarga cu Salubridad Publico, ta bisa cu e situacion ta keda uno preocupante y diaranson ultimo a registra un cantidad record di 176 positivo cu sigur tawata un sorpresa desagradabel. Keto bay e cifranan ta halto y cantidad di casonan positivo ta halto. ‘Nos a pone pa nos mes y pa nos pais Aruba cu nos ta bay baha e contagio y casonan positivo y mi ta convenci cu nos ta bay logra esaki tambe!”
Covid a causa hopi destruccion pa Aruba den tur sentido. Hopi persona a haya Covid, varios persona a fayece a causa di dje y hopi hende a perde nan trabou a causa di e crisis causa pa coronavirus. “Nos tin e obligacion pa frena esaki awo y busca e manera pa deal cu ne pa futuro cual no ta nada facil. Nos no por spera cu nos lo yega 0 caso positivo por lo pronto teniendo economia y frontera habri.”
Na hospital e cantidad di persona interna den afdeling a baha na 26 y den ICU na 11. E cantidad ta fluctua diariamente cu hendenan recuperando y hendenan interna. E cifranan aki lo keda fluctua den e simannan venidero. Gobierno, el a bisa, a cuminsa prepara aumenta e servicio pa hospital y pa haci esaki mester mas personal. A pidi y a haya aprobacion di Hulanda caba pa por amplia e capacidad di personal conforme e e plan di escalacion di hospital pa ta miho prepara. A anuncia siman pasa cu gobierno Hulandes lo yuda amplia e capacidad di personal pa Aruba ta miho prepara si en caso mester escala na 33 camber di Unidad Intensivo. Pa cu esaki ya caba a haci e peticion pa amplia e cantidad na 40 enfermero y 10 intensivista.
“Nos mester menciona cu un gran cantidad di persona a recupera nan salud completo. Awe pa prome bes tin mas persona a recupera cu tawatin caso positivo. Awe un total di 66 persona a recupera mientras 54 a test positivo. Total cu a recupera ta 1742 hende mientras cu tin 1617 caso activo. Pues actualmente tin mas hende a recupera nan salud cu tin casonan activo “Nos a bisa cu nos ta bay baha e contagio y nos a tuma varios accion concreto con nos lo bay haci esaki. Nos a reenforsa departamento di salud publico pa por maneha y domina e plamamento miho. Nos a haya 1 dokter di malesa infeccioso y 1 enfermero social di Hulanda pa sostene nos. Nos a amplia e team di ‘bron- en contacten onderzoek” cu ta activo caba pa yama tur esnan cu resulta positivo pa haci e contact tracing mas miho posibel. Nos a amplia e team cu mester haci control riba esnan den isolacion y quarantaine. E team aki ta consisti di mas di 80 ambtenaar cu lo haci e bishita y control fisico riba esnan den isolacion y quaraintaine. E control aki lo ta hopi estricto y esnan cu ta viola esaki lo haya multa cuminsando na mas cu 1000 florin pa luna.”
Tambe negoshinan cu ta viola reglanan di higiena y distanciamento social ta reparti den 2 categoria: negoshi chikito lo haya multa di 1500 florin y negoshi grandi lo haya multa di 3000 florin. Y violacion samenscholingsverbod ta 1000 florin “Di awor en adelante esnan cu no ta sigui protocol y no ta comporta nan mes lo haya multa. E controlnan lo ta hopi mas estricto y nos ta pidi pa tur hende mantene nan mes nan e protocolnan. Nos mester y ta pidi cooperacion di comunidad pa surpasa e dianan dificil aki. Ta hunto so nos por logra. Nos a bisa cu nos lo baha e contagio y nos ta bay hacie tambe!
