Mirando e ultimo desaroyo di prijs di gasolin y diesel, un ekipo di 24ora.com a subi caya p’asina wak kico pueblo ta opina di e desaroyo aki. Manera ta conoci, recientemente, Minister mr. Geoffrey Wever di RAIZ a anuncia subida di tanto prijs di gasolin, diesel y kerosin.Prijs di gasolin a subi cu 14.9 cen, diesel cu 26.1 cen y kerosin cu 29.1 cen. Esaki ta haci Aruba e Rey den prijs mas caro den combustibel compara cu Corsou y Boneiro.
A combersa cu diferente persona, for di pensionado, chauffeur di bus, trahado hotelero y mucho mas. E pueblo ta sinti cu casi nan no por biba mas cu si sigui subi prijs di gasolin. Mientras esun cu a inverti su ultimo 25 florin den gasolin, otro hasta ta evaluando pa stop di uza su vehiculo mirando e no por paga pa gasolin mas.
E ta varia na diferente persona, claro. Tur cos ta depende di bo entrada y asina wak con hopi bo por absorve e aumento aki. Tin persona cu ta tank 150 florin pa luna, otro 450 y tin cu tank como 125 pa dia, e ta depende bo trabou y e uzo di vehiculo.
Un cos a resalta durante e acercamento na pueblo. Locual nan ta desea, ta pa gobierno interveni den e situacion di gasolin mirando e ta horcando e pueblo. No esey so ta un peso sino e aumento di prijs di awa, coriente, cuminda; tur ta acumula y ta afecta e poder di compra grandemente.
Aña a habri na januari 2023 cu gasolin costando 243.8 cen pa liter. Henter aña e prijs a fluctua, pues a subi y a baha. Pero na september ya el a yega na 283.7 cen pa liter, loke ta traduci den un aumento comparativo di 39.9 cen riba cada liter di gasolin! Mester menciona cu den comparacion, aña 2022 a habri cu un tarifa di 230,6 cen pa liter y a cera cu e tarifa na 251,4 cen pa liter, cu toch ta 20,8 cen mas pa cada liter di gasolin. Pero a conoce hopi fluctuacion den aña.
No ta di awo ni tampoco pa motibo di e conflicto den Medio Oriente, sino for di tur tempo, e tarifa di combustibel na Aruba ta depende 100% di e mercado internacional. Si prijs subi na mundo, automaticamente e ta subi na Aruba tambe. E problema ta cu, politicamente, e mesun partidonan AVP y MEP den pasado a culpa otro di aumentonan di e tarifa, creando e impresion cu ta e minister por yuda ora e prijs subi of baha. Consecuentemente, e comunidad tin e tendencia di rabia cu gobierno ora prijs subi.
