No tin un sistema standarisa localmente, cu a wordo aproba door di tur hende concerni cu por bisa cu a yega na un concenso, cu Aruba tin un standard pa loke ta desperdicio medico, loke a haci ta cu e protocol cu nan ta trahando riba dje pa maneho di esaki, ta den conceptvorm ainda, segun beleidsmedewerker di DVG, Anselmo Matthew.
E ta algo cu no a bin cun’e zomaar. Ta algo cu a saca for di literatura, for di e diferente paisnan grandi na mundo y no ta papiando solamente di Canada, Merca, Hulanda, Inglatera, pero tambe a haya informacion hopi valioso di paisnan manera Belgica y cierto paisnan na Africa, Australia.
Protocol di maneho di desperdicio medico por keda cla dentro di un aña
Protocol di maneho di desperdicio medico por keda cla dentro di un aña. Click link pa mas
Posted by 24ora on Monday, May 27, 2019
Ta algo cu a busca extensivamente den literatura y door cu a manda tambe pa cierto instancianan manera un CARPHA y Hulanda, a haya feedback. Locual cu a pone hunto eynan, no ta bay diferencia grandemente di loke tin eyfo caba. Ta cierto regulacionnan cierto paisnan ta regula nan sistema un tiki mas specifico na nan manera di pensa of nan manera di haci, pero e aspectonan general ta keda existi. Awor aki, via e taskgroup di Bureau di Medio Ambiente, a haya e sosten cu nan tabata buscando e añanan anterior pa por a yega na un fase na unda cu e maneho aki por wordo implementa.
Tin cu bisa cu e taskforce ta trahando hopi duro. E proyectonan ta canando basta bon y pa esaki, e taskgroup tin su parti separa for di e taskforce, pa por uni na e concepto di e taskforce. Pa nan, nan ta spera cu den un tempo di un aña e lo ta cla pa wordo implementa.
E protocol lo mester bin cu su sancionnan, Matthew a splica. E maneho tin poni tambe e parti di sancion, pero e parti di sancion, loke tin di compronde, tin cu bay na e parti di ley. Di esey si no ta na altura ki tipo di sancion lo cay, den ki grado y kico e suma ta. Pero ta mara si cu mester bin sancion y tambe ta mara cu mester bin cierto departamentonan di gobierno cu mester tene un supervision riba cierto aspectonan di full e proceso di desperdicio medico.
Te awor aki, desperdicionan ta bayendo dump, te asina leu. Nan tin un bista na unda cu a caba di manda en principio un encuesta rond. A mand’e na e luganan principal incluyendo dentista y ortodontistanan. A haya basta feedback. A analisa e datonan, pero ainda tin cu wak con ta bay verwerk esakinan, pa wak con ta bay hink’e den e concepto di maneho pa logra cubri tur aspecto cu a ripara di e encuesta cu ainda falta un tiki finetuning.
Matthew a comenta cu Serlimar y Ecotech, nan clientenan nan a duna baki a base di e color di e tapa, kico tur mester bay den cua baki. No ta manera e dos companianan ta laga cualkier cliente di nan tira diferente tipo di sushi den un baki y pa na transporta esey.
E dos companianan di sushi, ta haci nan best pa ofrece diferente baki, pa segrega e sushi cu ta wordo produci. Tin pais ta hopi avansa cu e procesamento di desperdicio medico. Otro pais ta depende di e paisnan mas grandi a logra haya sa, cua tecnologia nan ta uza of ki otro posibilidadnan tin. Pero si compara Aruba cu paisnan cu ta mas of menos mesun grandi di propiedad y poblacion, ta bisa cu nos ta riba e mesun nivel cu e otro islanan.
