“Atencion na nos clientenan den area di Seroe Biento, Piedra Plat, Pavia, Cumana, Morgenster y vecindario: Nos a confronta un problema den e distribucion di coriente den e area aki. Nos tecniconan ta mobilisando pa atende cu esaki. Nos lo duna mas update asina cu nos tin mas informacion”, asina N.V. ELMAR a informa riba nan pagina di Facebook. Anteriormente a hasta pone cu e tecniconan tabata ocupa na Noord cu un accidente y cu ora nan finalisa, nan lo sigui pa e reto na Santa Cruz y Paradera.
Entretanto, for di 5:43 pm cu coriente a bay den e districto di Noord debi na un accidente dilanti Noord Medical Center, ta te cu 7:31 pm a logra suministra coriente na e vecindario. Un ke otro a tarda pasobra mester a reemplasa e palo di luz. Ta parce awo cu ta tur dia tin accidente di auto envolviendo un palo di luz, cu consecuencia cu un of mas bario ta perde suministro di coriente.
E motibo dicon coriente a bay na Santa Cruz, Paradera y vecindario ainda no ta conoci. Berdad ta cu e sistema di comunicacion via Facebook a avansa, pero e contestamento di telefoon na ELMAR ora cu coriente bay si ta keda un reto. Publico ta keha cu sea nan no ta contesta mes of ta papia fresco cu e clientenan. Pero ni riba Facebook tampoco a duna motibo di e interupcion, sea ta accidente atrobe of ta un fayo den e red di distribucion di NV ELMAR.
Nos ta keda pendiente pa mas informacion.
