Siguiendo e Masterplan di Sero Colorado, dialuna mainta Minister di Turismo Dangui Oduber a anuncia inicio di un parti di e plan aki.
Esaki ta e parti di embeyecimento, upgrading y mehoracion di e parti na Baby Beach y Rodgers Beach.
Tin un parti cu a keda cla, cu ta Fase I, y awo ta den ehecucion e di dos Fase cu ta consisti di organisa y percura pa crea un miho
parkeerplaats cu iluminacion y un bunita landscaping. E otro parti cu ta bay cuminsa awo ta construccion di kiosconan. Ta
bay renoba e cancha di tennis cu cuater cancha. Dos di nan ta pa tennis y e resto ta espacionan deportivo multinacional.
Loke ta bunita
ta cu memey e area ta construi un espacio pa un restaurant di calidad, pa entre otro loke lo atrae turistanan di entrada halto.
E bestek di Fase III ta den preparacion pa anuncia kico e proyecto ta encera. E prome parti cu lo mand’e pa desyaho publico, otorga e
proyecto cu e intencion pa finalisa di e forma aki cu e Masterplan di Baby Beach.
E ceremonia di dialuna mainta tabata na Rodgers Beach cu tambe ta haya e atencion necesario, cu inversion den e infrastructura. “Nos ta kere den San Nicolas y a demostra esaki cu plan y accionnan concreto. A busca e fondonan pa haci e inversionnan necesario. Nos ta contento di por anuncia cu e proyecto di Rodgers Beach lo cuminsa denter di algun siman. Ta warda e parti di bestek keda cla y bay den e parti di destaho publico,” e mandatario a conta.
Ta bay construi un voetpad di concret cu ta cuminsa for di e skina unda antes tabata Esso Club pa conecta e parkeerplaats di Baby Beach cu Rodgers Beach. Eynan tambe ta construi un area pa cana di palo pa e trapi renoba recientemente. Pero mas importante ta bay amplia e beach di Rodgers Beach, creando mas espacio pa local y bishitantenan.
E proyecto ta inclui tambe un parkeerplaats nobo, mehora e palapanan y creacion di algun mas. Loke no por keda afo ta e landscaping cu ta
duna henter e area un aspecto masha bunita. Ta hopi tempo desde cu a areanan aki haya atencion. Ministerio di Turismo lo haya cooperacion di Aruba Tourism Authority pa instalacion di bañonan mobil. E plannan aki tabata existi for di 2020 pero pa motibo di pandemia no por a ehecuta ningun di e proyectonan aki. Sinembargo awe poco poco nan ta bira realidad.
