Esaki ta loke e mandatario a duna di conoce awe den oranan di mainta. Prome Minister Evelyn Wever Croes a reacciona pasobra varios miembro di prensa a puntra kico e ta pensa di e mocion di desconfiansa contra Marisol Lopez Tromp cu a pasa diahuebs ultimo den Parlamento.
E prome mandatario no por a concentra esaki den fin di siman, ya cu a dedica tempo na famia relaciona cu entiero di un omo cu a fayece. “Mi a duna prioridad na e ceremonianan di despedida y famia.”
Constitucion ta bisa cu si un minister no tin confiansa di parlamento mas, e mester tuma honor na su mes. Den e caso aki, Gobierno a ricibi e mocion di desconfiansa for di parlamento diabierna ultimo “y mi mester papia ainda cu e minister pa scucha di su banda kico a causa e desconfiansa y e mocion di parlamento. Nos mester ta sincero, un mocion asina no ta bini sin mas. Ta tres of cuatro biaha caba cu parlamento a yama e ministernan. Parlamento na mas di un ocasion a pidi gobierno pa busca un solucion pa un grupo den comunidad cu kier gana nan pan na un forma honra. Si Parlamento yamabo tres of cuatro biaha y ainda no por presenta un solucion, mester tin algo cu no ta bon,” Wever Croes a bisa.
Prome Minister a bisa cu dos dia prome cu e reunion Conseho di Minister completo a bay di acuerdo pa destina un area pa esnan cu ta tira pisca sin cu e ta afecta medio ambiente y Minister Marisol Lopez Tromp a bay di acuerdo. Awo loke prome minister ta bay averigua cerca e mandatario si tin algo a cambia despues di e reunion di Conseho di Minister y di con no a informa su persona como e persona cu ta lidera e Gobierno di e hecho ey. “Esey ami lo a haci si berdad mi kier a yega na un solucion. Mi no a haya chens ainda pa papia cu e minister. Mi kier ta bon informa prome cu mi por duna un reaccion,” Wever Croes a bisa.
Pero tambe el a bisa cu los si e mocion ta legal of no, no por nenga cu e fraccion cu a pone e minister eynan no tin confiansa mas den dje.”Esaki ta algo hopi serio. E fraccion mas grandi den parlamento tampoco tin confiansa mas den e minister. Tur dos fraccion a expresa esaki y a vota pa e mocion. Esaki ta algo hopi grandi.” Banda di esaki, ningun di e otronan no a bisa cu nan si tin confiansa den e mandatario, ya cu nan a core sali di parlamento pa no vota pa e mocion. “Esaki ta algo serio y nunca visto na Aruba. Si ta na Hulanda, un minister cu no tin apoyo di su fraccion, lo a tuma honor na su mes pa hopi tempo caba.”
Prome minister tambe den su declaracion ta bisa cu e no a spera cu lo a bini otro crisis den Gobierno despues cu Conseho di Minister a yega na un acuerdo. “Mi a kere cu nos a soluciona e tema aki pasobra Aruba ta enfrentando varios reto. Mi tin mi mannan yen cu varios reto pareu …. P’esey mi a pidi tur e ministernan pa evita mas crisis cu no ta necesario. Y esaki ta algo simpel cu a tuma un decision caba riba dje pa algo, contal cu e bay segun regla y tratadonan. Mayoria minister ta coopera y purba evita mas crisis. Mi ta bay tuma tempo pa atende cu e asunto aki di mocion di confiansa.”
