Despues di a tene nan reunion general pa tur nan miembronan dos siman atras, e federacion di karate ta cla pa organisa nan prome campeonato pa loke ta e calendario di e aña 2018.
Esaki lo tuma luga riba diadomingo 25 di maart 2018 pa 9or di mainta den Compleho Deportivo Frans Figaroa na Noord. Sigur lo por disfruta di e numeroso combatenan den e diferente categorianan tanto den e nobatonan como tambe esnan mas avansa den tur color di faha.
E deporte di karate ta den pleno desaroyo na Aruba. Pa algun aña e deporte ta bin ta creciendo den forma rapido y cu varios scolnan nobo. Tin varios Dojo unda nos muchanan por praktica e deporte di arte marcial, pa nombra algun di nan nos tin Dojo Gyoseki Kan Tamashi Aruba, Dojo Shoshinkai Shotokan Karate Do, Karate-Do Ryubo-Kai, Dojo Shibumi, Dojo Shocokan, Dojo Budokan y asina tin algun mas. Mas cu claro nos atletanan di karate ta explora nan desaroyo y conocimento door di participa na competencianan internacional den nos region y continente y mayoria biaha cu exito logrando medaya. Pa e competencia di 25 di maart, tur scol ta cordialmente invita pa bin participa den categoria ‘kata’ y ‘kumite’. Un invitacion special ta bay na e amantenan di karate, famia, amigo y conocirnan pa yega stadion Frans Figaroa na Noord y apoya nos muchanan den e deporte di arte marcial.
Stichting Sportsubsidie Aruba ta subsidia e promecampeonato di karate organisa pa Aruba Karate Bond.
Cumprando weganan di Lotto, e Loteria di Aruba manera Catochi, 1-Off, Big 4, Zodiac, Wega di Number Korsou, Lotto di Dia, Lotto 5, Mini Mega cu su Mega Plus y e diferente weganan di Raspa Y Gana bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e Stichting Sportsubsidie Aruba.
