Diamars 24 di januari OPPA a organisa e prome actividad pa aña 2023. Un grupo basta grandi a bishita San Nicolas pa un caminata den e cayanan y asina admira e bunita pinturanan di muraya riba diferente edificio. Cu bus a sali exactamente 9:00 am for di Centro Deportivo Betico Croes rumbo pa artista, Art Gallery den e caya principal di San Nicolas.
Aki Tito Bolivar, curator di e arte riba muraya, a duna e bishitantenan un caluroso bonbini. Bolivar a conta e storia interesante con el a bin na e idea di haci di San Nicolas e capital cultural di nos pais. Den e galeria por a admira diferente obra di arte di artista local. Tambe el a conta di e Galeria di Arte cu e ta organisa tur aña den luna di September y cu tanto e localnan como e turistanan ta gosa hopi di dje.
A parti e miembronan den dos grupo pa bou di guia di Bolivar y Jean a sigui un caminata pa admira tur e bunita pinturanan. Na cada obra di arte a splica con e proceso di e artista a tuma luga, pa yega na crea e obra di arte riba e muraya. Tabata un mainta educativo cu hopi informacion y e participantenan a gosa di e bunitesa di e galeria di e cayanan. Por a admira bunita obra/pintura di hoben talentoso di Aruba manera Armando Goedgedrag y Lowe. Tambe a haya splicacion di e tecnica di bira un potret chikito den e pintura cu dimension corecto den un escala hopi mas grandi.
Tin obra di e artistanan di pintura di muraya internacional p.e. di Republica Checa, Slovakia, Portugal, Alemania, Curaçao y Colombia. Tur ta obra magnifico riba nan mes. E parti aki di San Nicolas ta sigur un atraccion turistico importante pa San Nicolas, cu ta conoci como number uno den Caribe.
Despues di e caminata e grupo a cana bay na Art.ish Café na final di e caya principal. Tabatin transporte pa e miembronan cu a prefera di no cana e distancia ey. Na Art.ish Café por a disfruta di un tremendo Johny Cake cu ‘saltfish’ y un dushi juice di lamunchi. E ambiente tabata ameno.
Na final bus a bin busca e miembronan di OPPA patras di caya y hiba nan bek na Centro Deportivo Betico Croes. Sigur por bisa cu e actividad aki, en conexion cu celebracion di Dia di Betico, tabata un exito y nos miembronan a gosa hopi. OPPA kier gradici tur e miembronan, Fundacion Artisa, Art.Ish Café y na Fofoti cu a participa na e mainta aki. Keda pendiente pa e siguiente actividad di OPPA.
