Federacion di Ahedres conhuntamente cu Traimerdia ta cla pa start cu e projecto ‘Ahedres ta bai den Bario’ dia 1 di oktober venidero.
Cu e projecto aki e federacion ta spera di por brinda tur mucha di Aruba entre 6 y 12 aña e posibilidad pa sigi les gratis di ahedres. Ta conosi cu e deporte di ahedres por stimula e abilidad cognitivo di e mucha y por lo tanto por yude e.o. den su prestacion na scol.
Lesnan lo wordo duna na e diferente localidad di Traimerdia, pero tambe den diferente Centro di Barionan. E lesnan ta completamentamente gratis.
Pa e training lo bin un maestro internacional di ahedres di Cuba, den persona di Lázaro Bueno Pérez. E lesnan ta programa pa draai den ciclo di 3 luna.
Lo cuminsa cu e lesnan na Traimerdia den e diferente districtonan, pero tambe den Centro di Bario Lago Heights y esun di Playa Pabao. Na e dos centro di barionan aki tur mucha ta bonbini pa tuma les (gratis). Lesnan lo wordu duna entre 2’or – 3’or y lo cuminsa na San Nicolas dia 1 di oktober (tur dialuna) y na Playa Pabao 2 di oktober (tur diamars). Mayornan cu kier keda durante e les, por hasi esaki libremente.
Por inscribi e mucha den e siguiente forma:
Telefoon: 594-5590/594-1351
Email: [email protected]
Site: www.arubachess.com
Clubhuis: diahuebs anochi of diasabra entre 12:30 pm – 4:30 pm
Mas informacion over di e projecto por wordo haña riba e site di e federacion (www.arubachess.com), pero tambe por hasi uso di cualquier otro medio di comunicacion cu ta menciona aki riba pa bin den contacto cu e federacion. Por like nos tambe riba nos Facebook page (arubachessfederation) pa asina por haña informacion relata cu e projecto aki.
Nos ta spera cu nos por yama bonbini na hopi mucha di Aruba na e lesnan aki.
Nos kier a yama un danki un biaha mas na tur nos sponsornan cu ta e.o. Lotto Aruba, WEB Aruba, Aruba Bank, Arubus y Setar.
Aruba henter, ban bisa: ‘Yes to Chess’ y participa den e projecto ‘Ahedres ta bai den Bario’ cu ta na bienestar di nos juventud y comunidad.
