Dialuna den ora di merdia tres hues di Corte di Apelacion a trata e caso penal contra e hoben Izaak Principaal acusa di a asesina Sayuri Petronia di 19 aña dia 4 di juni di aña 2021. Procurador General a pidi pa confirma sentencia di Corte di Prome Instancia.
Inicialmente tanto Ministerio Publico como e defensa a apela e decision di prome instancia pa motibo cu no a haya esaki por escrito na tempo, prome cu e periodo di apelacion caduca. Esaki a sosode na october di aña pasa. Defensa tambe a apela pa mesun motibo.
Finalmente un dia prome cu Hof tabatin e caso aki riba rol e sentencia a keda cla y Ministerio Publico a hala su caso aden, pero defensa a sigui cu e apelacion pa solamente cinco acusacion, cu ta inclui matamento y intento di asesinato, atraco y maltrato.
Defensa tabata kier a pidi pa kita e TBS (poni na disposicion di estado cu ta nifica cu e no tin fecha pa haya su libertad) cu Corte di Prome Instancia a impone hunto cu e castigo di 9 aña.
