Bo tawata sa cu mas di 70% di cachonan na Aruba ta biba den estado negligente, maltrata y abusa? Bo tawata sa cu e problema principal di e super poblacion di cacho aki na Aruba ta ocasiona door di ‘breeding’ na prome luga? Sigui pa e falta di responsabilidad di doñonan cu no ta castra ni sterilisa nan cacho(nan)domestico?
Bo tawata sa cu 7 di cada 10 cas cu tin un cacho na Aruba ta scoge pa cumpra enbes di rescata of adopta uno den pleno 2020? O sea mientras cu tin miles di cacho na Aruba bibando den negligencia, pasando trabou y hamber riba caya, mas cu 2/3 parti di nos comunidad ta scoge pa no yuda uno cu mester, sino cumpra … aportando pues na e causa primordial di e problematica aki na Aruba?
Fundacionnan a y ta purba di tur manera pa haya sosten di gobierno, pa habri nan wowo pa e realidad tristo aki, pero TUR ta scoge pa keda pusha e realidad aki abou pa e no bin na superficie. Tur dia fundacionnan ta man yen purbando di soluciona un problematica cu ta responsabilidad di nos comunidad, un problematica social y pues un problema cu merece e atencion debido di nos gobernantenan! Pero ta prefera di promove santo blanco cu lama, un isla di 5 strea y inteligencia di nos hendenan cu por papia 4 idioma, mientras esaki ta e realidad di con NOS ta trata nos bestianan na Aruba -‘One Happy Island’-.
Fundacionnan ta boga gobierno pa hinca man den e asunto aki cu e prontitud cu e problema aki ta demanda, pasobra mientras no bin cu leynan severo pa proteccion di nos bestianan y no PARA y STOP e rasamento y bendemento di miles di cachonan manera paddenstoel na Aruba, HAMAS lo mira un luz den horizonte pa e problematica aki!
E problema primordial tawata/ta y lo keda e rasamento den exceso di cacho cu tin na Aruba, caminda NO tin demanda pa esaki y unda eventualmente nan ta end up riba caya pasando trabou y hamber pa motibo di e iresponsabilidad di nos comunidad y tambe di gobierno cu no kier haci nada. Mesun lihe cu nos ta pa adapta y tuma tur sorto di cultura y normanan di otro pais over … awe por cuminsa den e area aki tambe y cuminsa wak con gobierno y e comunidad ta trata cu nan bestianan na otro pais y aplica esaki na nos isla!
“CACHONAN RIBA CAYA TA E REFLEHO DI UN SOCIEDAD INMADURA Y FRACASA, PASOBRA E GRANDEZA DI UN NACION Y SU PROGRESO MORAL POR SER HUZGA NA E FORMA CU SU ANIMALNAN TA SER TRATA”.
“MIENTRAS MAS INDEFENSO UN BIDA TA MAS DERECHO E TIN NA PROTECCION DI HUMANIDAD SU CRUELDAD!”
Tin ora e diferencia entre bida y morto ta ABO; Adopta/Rescata/Foster/Cuida/Yuda – pero no bira lomba bay sin haci nada!
