Universidad di Aruba (UA) lo organisa e aña aki un ‘Open dag’ virtual y ta invita un y tur pa join dia 5 di november, di 6’or di atardi pa 8’or y mey di anochi pa un anochi di informacion. Ta encurasha tur futuro studiante y mayor, esnan interesa pa sigui studia, sin excepcion, pa registra via: https://mailchi.mp/ua/vod
UA ta orguyoso di ofrece nuebe area principal di concentracion y tambe un Aña Basico Academico (Academic Foundation Year) cu ta permiti e studiantenan di prome aña pa habri full nan potencial educacional. UA ta ofrece un scala di actividad extra-curicular cu orientacion riba un carera, tutorial y programa cu ta promove salud en general, bienestar y crecemento.
E studiantenan tin oportunidad tambe pa studia den exterior cu nan partnernan global di Erasmus + programa. Durante e ‘Open Dag’ virtual bo tin oportunidad di para na nan booth di informacion, download foyeto, haya acceso na video y combersa cu e facultad. Nunca e compromiso di UA pa ofrece educacion excepcional y accesibel no a tambalea durante e temponan tumultuoso aki. Educacion ta esun cos cu hamas no por kita di y nunca no ta laat pa cuminsa. Bin y mira loke por logra na UA.
Apesar cu gustosamente UA lo a invita un y tur pa su ‘open house’ tradicional na nan campus, tin cu tene cuenta cu salud y siguridad di nos tremendo comunidad. Studiante di Trabao Social, Mizaira Vrolijk, a papia riba su experiencia den e estudio. El a comenta cu el a caba cu 17 aña. E kier a bay den exterior pa sigui su estudio, pero debi na su edad e mester a keda Aruba un aña. El a haya e estudio di Social Work & Development interesante y el a dicidi bay studi’e. E preparacion tabata un poco diferente, pasobra HAVO y UA ta completamente diferente. Ta diferente manera di duna les, segun Vrolijk.
Pero e estudio ta bayendo great. El a gusta con tur hende den su klas tin e pasion pa yuda hende y esey ta algo cu e ta follow up den bida real. E contacto sinembargo cu e docentenan tey, pero na e mesun momento e ta un poco straño pasobra no tin contacto en persona. Ta stroba cierto maneranan pa haya les. Apesar di esey, e docentenan ta tuma tur nan tempo pa prepara e lesnan, pa yuda e muchanan si nan tin problema. Con nan ta asina entusiasma den e les y hasta online nan ta entusiasma pa duna e les.
Michael Flores tambe ta un studiante d’e programa Organization, Governance and Management (OGM) . Na prome instante e no kier a registra den UA pasobra e tabata tin un trabao caba. Door di wak tur e oportunidadnan cu e tabata tin y cu e por a haya cu OGM, el a dicidi di laga su trabao y sigui su estudio pa e ora ey e por crece mas lihe como profesional.
Tur e teoria cu ta haya den klas, e por aplica den su bida diariamente. Tur e procesonan cu e tabata wak como profesional, e ta wak awo den un classroom environment. Awo e por aplica tur cos cu e ta siña den un klas.
Deborah van den Berg-Alexander di coordinadora di Center for Lifelong Learning ta invita un y tur pa tey presente dia 5 di november cerca dje, den e Expo Booth di 6’or y 45 te cu 7’or y 45 pa puntra tur loke Lifelong Learning ta. Sea bo ta studiante, mayor, trahando, profesional. Center for Lifelong Learning tey pa yudabo pa bo sigui studia pa bida. Pa mas informacion, bishita nan website ua.aw of sigui nan ariba Facebook y Instagram.
