Diasabra awo dia 12 di juni 2021, Departamento di Salud Publico (DVG) lo vacuna un cantidad grandi di persona cu durante Vacunathon edicion nr 2 a busca nan prome vacuna y tambe tur esunnan cu a haya e prome vacuna mas cu 3 siman atras of riba dia 23 di mei. Esaki ta e motibo pakico diasabra awo dia 12 di juni Centro Libertador Betico Croes na Santa Cruz y Teresita Center na San- Nicolas lo ta habri atrobe durante henter dia for di 9:00 am te cu 4:00 pm ‘non stop’.
DVG ta warda tur persona cu durante vacunathon edicion nr 2 a pasa busca nan prome vacuna, pa acudi atrobe pa busca nan di dos vacuna diasabra awo. Riba e dia aki tambe lo tin e posibilidad pa esnan cu ainda no a vacuna pa simplemente “walk In” y ricibi nan prome vacuna di Pfizer ainda.
Esunnan cu por vacuna ta:
* Ciudadanonan di 18 aña of mas
* Hobennan di 16 of 17 aña cu condicion di salud
* Hende muhe na estado of cu ta duna lech’i pecho
* Ciudadano indocumenta cu estadia mas largo cu 6 luna riba Aruba
* Ciudadano cu permiso di trabou, stage of asilo politico
Na e momentonan aki Aruba tin un total di 64.990 ciudadano ya caba vacuna cu ta representa mas cu 65% di nos poblacion di 18 aña of mas. Mirando e reduccion drastico den casonan activo y e reduccion den e plamamento di e virus, DVG ta pidi esunnan cu ainda no a vacuna, pa yama na number 280-0101 of registra via Aruba Health App of www.dvg.aw pa asina ricibi un cita pa vacuna. E virus no a somenta, e t’ey y nos tin pa sigui lucha contra su transmision.
