Durante e conferencia di prensa extraordinario di gobierno, a indica na prome minister, cu tin e sentimento cu gobierno ta desconecta cu pueblo. Gobierno ta indica cu tur cos ta bayendo bon na Aruba, tin placa adicional pa inversion, turismo ta den su top momento di historia y cu economia ta creciendo miho cu a premira pero pueblo mes no ta sinti esey.
Pueblo ta sinti cu, aunke cu tur cos ta positivo na Aruba, segun gobierno, toch e placa no ta yega. Costo di bida di haltisimo, pensioen no ta yega, inflacion ta horcando e humilde ciudadano.
Gobierno di su banda a indica cu contrario na e dicho pensamento, nan si ta kere cu nan ta conecta cu pueblo. Den diferente forma por comproba esey, segun Wever-Croes a indica. Nan ta activo den bario, sea riba nivel ministerial of di partido.
“Nos ta riba e bon caminda pero no a yega ainda unda nos kier yega”, a prome mandatario a indica. Den nan plan, nan lo enfoca pa “leave no one behind.” Nan ta trahando duro pa no solamente ta positivo riba papel pero tambe cu e pueblo por sinti cu nan tambe ta progresando. Si mira por ehempel, 25 mil florin cu Minister Xiomara Maduro lo aloca pa activa un hefboom pa CAD of prome minister for di su minister, un plan completo pa computer nobo pa Departamento di Recurso Humano, esaki no ta refleha den e necesidad di pueblo.
Instancia manera Lions Club recientemente a indica cu e demanda pa cuminda a subi drasticamente. Pues, e prioridad di gobierno ta parce di ta na e luga incorecto.
