Mentira no ta amigo di hende, mentira nunca a yuda ningun hende, mentira semper a y lo laga hende su cara keda na berguensa.
No tin ningun clase di crecemento den mentira, al contrario hende lo biba bao di sombra di derota.
No ta cumbini hende gaña pa yega na algo, ni tampoco cera ningun acuerdo bao di mentira, pasobra den e momento no espera tur cos por basha abao.
Un lenga mentiroso ta odia esunnan cu e ta lastima, y un boca cu ta labia, ta obra ruina.(Proverbionan 26:28).
Ora un persona ta gaña su hendenan di cas, e persona ey ta odia su famia, sea e ta den adulterio, bicio, inmoralidad etc e persona ey su pensamento ta bay contrali na bienestar di su famia.
Mundo henter ta yena cu tur clase di mentira, ta parce manera mentira ta cultura, ora mandatarionan mundialmente ta gaña e pueblo y nan sa, cu no ta existi inmunidad di mentira bao di ora di trabao ,pero tur mentira ta wordo considera como mentira dilanti di Dios.
Tin consecuencia hopi grave pa mentira, pasobra mentira ta deseo di diabel, pasobra Hesus a bisa lo siguiente; Boso ta di boso tata e diabel, y boso kier haci e deseonan di boso tata. E tabata un matado for di principio, y no ta para den e berdad, pasobra no tin berdad den dje. Ki ora cu e papia un mentira, e ta papia for di su mes naturalesa, Pasobra e ta un gañado y e tata di mentira. ( Juan 8:44).
Nos mester aparta completamente for di mentira, pasobra mentira no tin solucion pa nos bida, al contrario mentira ta rebaha hende, pasobra ta esey ta locual diabel kier haci ta di rebaha e creacion di Dios, y nos ta mira cuanto hende a cay den su trampa, y kier desvia for di nan creacion original y drenta un mundo di fabula,cual ta bira un rechaso y condena dilanti di Dios.
Mira pa ningun hende no coge boso preso door di filosofia, y engaño en bano, segun tradicion di hende, segun e principionan elemental di mundo, y no segun Cristo.( Colosensenan 2:8).
Ma e Spirito di Dios ta bisa claramente cu den e ultimo temponan , algun lo cay for di fe, door di paga atencion na spiritonan engañoso y doctrinanan di demoño, pa medio di hipocresia di gañadonan, kende nan mes consenshi a wordo kima comosifuera ta cu hero cayente esaki a wordo haci.( 1 Timoteo 4:1-2)
Tene cuenta cu hende por gaña hende pasobra Hesus mes a bisa: Mira pa ningun hende no gaña boso. Pasobra hopi lo bin de mi nomber bisando: Ta ami ta e Cristo. Y boso lo tende di guera y rumornan di guera, mira pa boso no spanta, pasobra e cosnan ey mester tuma luga ma ainda no ta e fin.
( Mateo 24:4-6).
Bo por wordo decepciona door di e cultura den cual bo ta biba p’esey e palabra di Dios ta bisa;No sea conforme e mundo aki, ma sea transforma pa medio di e renobamento di boso mente pa boso por comproba kico ta e bon y agradabel y perfecto boluntad di Dios.( Romanonan 12:2).
Pasobra e mente fiha riba e carni ta enemistad contra Dios, pasobra e no ta somete su mes na e ley di Dios, como e no ta capaz pa haci esey tampoco. Y esnan cu ta den carni no por agrada Dios.( Romanonan 8:7), Pasobra tur esunnan cu ta wordo guia door di e Spirito di Dios esakinan ta yiunan di Dios.
Dios tene misericordia y libra mundo for di mentira.
Sinceramente, Pastor Marcel Balootje.
