Un di e miho forma pa prepara bo yiunan contra e peligernan di abuso di menor ta door di papia cu nan y conscientisa nan pa nan reconoce cierto señalnan cu por yuda preveni un situacion di maltrato of abuso den futuro.
Algun tips:
● Papia cu bo yiunan tocante comportacionnan apropia y inapropa
● Papia cu bo yiunan pa reconoce situacionnan sigur y insigur
● Siña nan kico pa haci ora un persona actua inapropia cu nan y con pa busca ayudo
● Mantene un comunicacion habri cu bo yiunan, pa asina abo como adulto por identifica cosnan cu ta fuera di normal den nan comportacion
● Percura pa bo hogar ta un luga sigur pa bo yiunan
● Preveni di laga bo yiunan nan so of cu un persona cu bo no conoce bon
● Semper ta na altura como mayor unda bo yiunan ta ora nan bay sali
● Siña nan kico ta sexualidad na un forma cu ta apropia pa su edad, esaki ta cuminsa di edad chikito cu e conocemento cu un mucha ta diferente cu un adulto.
● Custuma di yama e parti priva di un mucha na su nomber y no dun’e un nomber manera “koekie”
● Educa bo yiunan cu ningun hende mag di mishi cu nan partinan priva sin nan permiso, esaki ta conta pa abo tambe como mayor.
● Locual cu tambe ta yuda ta pa abo como e adulto responsabel pa un mucha desaroya un bon relacion cu e personanan den e bida di e mucha por ehempel; su docentenan, su “baby-sitter”, e mayornan di su amigonan, su coach di sport entre otro.
Tur esaki por yuda pa preveni posibel abuso di mucha, door di duna e menor e hermentnan
pa e mes por reconoce e peliger ora cu abo como mayor no t’ey. E ta yuda tambe na
desaroya un “netwerk” fuerte den e bida di un mucha cu ta importante pa e sosten y
vigilancia den cualkier situacion delicado.
Como mayor, educado of cuidado di mucha bo por busca informacion, ayudo y guia tocante
educacion y lantamento di mucha cerca Tienda di Educacion por yama na 161 of cerca
Fundacion Pa Nos Muchanan por yama na 588-0856 of 583-4247. Pa ayudo y conseho den
educacion contra abuso di menor por tuma contacto cu Fundacion RespetaMI na 582-4433.
Ora bo ta sospecha abuso di menor tuma contacto cu Bureau Sostenemi na 588-1010 pa
conseho y ayudo. Den caso di emergencia yama 100.
Pa haya sa mas tocante abuso di menor bishita nos website www.scparuba.com. “E
bienestar y siguridad di nos muchanan ta e responsabilidad di nos tur” – Sociaal Crisis Plan
