Minister Dangui Oduber ta haci entrega di e prome fase di SV Estrella su masterplan

Diamars atardi Minister di Deporte Dangui Oduber conhuntamente cu Minister-President Evelyn Wever- Croes, a entrega otro proyecto di deporte. SV Estrella a presenta un masterplan den tres fase y diamars atardi a tuma luga e entrega di e prome fase di e proyecto.

Den e prome a fase a construi un entrada pa e stadion di SV Estrella unda antes esaki tabata un ruina. Tambe a traha un veld di mini futbol di artificial turf pa asina mas mucha por train na e mesun momento. E maneho di deporte di Minister Dangui Oduber ta entre otro basa riba mehoracion di facilidadnan Deportivo. E mandatario ta di pensamento cu tur veld na Aruba mester tin bon iluminacion y artificial turf.

SV Estrella no ta un ekipo desconoci den e deporte di futbol na Aruba. SV Estrella a competi den division di honor casi ful su existencia y a titula campeon na varios ocasion. Dos ekipo na Aruba so a logra gana copa Antiano y SV Estrella tabata un di nan cu a logra e titulo aki na aña 1970. Deporte ta tene nos hobennan activo y riba e bon caminda, asina e mandatario a trece dilanti.

Minister Dangui Oduber ta haci entrega di e prome fase di SV Estrella su masterplan

Minister Dangui Oduber ta haci entrega di e prome fase di SV Estrella su masterplan

Posted by 24ora on Wednesday, March 3, 2021

Gobierno ta sostene tur proyecto cu ta yuda na eleva e nivel di deporte na Aruba. Segun e minister gobierno ta haciendo tur esfuerso pa yuda deporte, apesar di e retonan cu tin, gobierno ta sigui yuda organisacionnan deportivo por medionan creativo. Varios compleho deportivo ta hayando material, luznan LED y turf. Ya caba ta varios veld a haya nan iluminacion pa asina e ekiponan por practica parti anochi. Na final di dia ta importante pa stimula participacion activo di mucha y hoben den deporte.

Finalmente minister Dangui Oduber a manda palabra di pabien y gradicimento na e directiva specialmente na presidente di Estrella Denchi Werleman y tambe Michel Lopez, miembronan di S.V. Estrella. Minister ta hopi gradicido na tur e boluntarionan cu ta duna di nan tempo liber pa guia y desaroya hoben. Esaki ta algo di aprecia pasobra ta hopi tempo y energia ta bay na tur training y wega y
ta sumanente importante pa tin e boluntarionan aki cu tin curason pa deporte. “Danki na bosonan pa yuda communidad den loke boso ta haci,” e minister a bisa por ultimo.