Durante un conferencia di prensa di Camara di Comercio, Kawish Misier, a anuncia cu a yega momento pa retira. Diabierna den oranan di atardi Camara di Comercio a tene un conferencia. A splica e rol di KVk den comunidad, existiendo pa casi 90 aña Caba. No solamente a splica nan rol, pero tambe tur e trabou cu nan a haci e aña’ki y loke a logra di uni sector priva den e lucha cu gremionan comercial ta wordo scucha den decisionnan importante cu mester wordo tuma pa bienestar di Aruba. Pero tambe a papia di e proyectonan pa otro aña.
Na final a presenta e directiva nobo y loke a hala atencion tabata cu Kawish Misier no ta forma parti di esaki. El a recorda cu el a drenta directiva tres aña pasa, ora cu e tabata tin 26 aña. Pa forma parti di e directiva mester tin 25 aña.
El a splica cu el a drenta pa 3 aña, cuminsando como Vice Presidente y e ultimo aña el a fungi como Presidente.
El a bisa cu awo e ta laga espacio pa otro personanan cu energia nobo sigui cu e direccion scogi door di KVK cu ta encera un plan strategico traha pa cinco aña.
Misier ta bolbe sector priva, enfocando riba su mesun plannan, negoshi di famia.
Tambe e kier enfoke pa realisa proyectonan grandi di 100 miyon bay ariba. E ta dispuesto pa yuda KVK of cualkier organisacion cu ta traha na bienestar di Aruba.