Luenne Gomez-Pieters ta retira

E siman aki Minister Dangui Oduber a anuncia cu el a manda un carta pidiendo retiro di e Hunta di Supervision di Dr. Horacio E. Oduber Hospital. Na mes momento el a anuncia cu mr. Luenne Gomez-Pieters ya a tuma su retiro caba, prome cu el a haci dicho peticion. Su retiro lo drenta na vigor dia 1 di januari 2020. Esaki ta cera un etapa di 5 aña y mey cu Gomez a dedica, separa na su funcion pisa, pa aporta na bienestar y progreso di Hospital.

Den su carta di retiro, Luenne Gomez-Pieters, mama di tres yiu, a menciona cu na Departamento di Impuesto nan ta manehando proyectonan grandi, cu ta rekeri tur su atencion y ta lag’e cu tempo limita pa atende cu e retonan di Hospital. E ta prefera uza e tiki tempo cu a sobra na su famia y como tal a pone su asiento disponibel pa e Hunta di Supervision scoge un miembro nobo na su lugar.

Ta bon pa enfatisa cu Hospital no ta un departamento di Gobierno, sino un fundacion di 7 miembro di cual 2 ta “kroonlid” apunta dor di Gobierno. E otro cinconan, ta wordo nombra segun e statutonan door di e hunta di supervision mes. Mester mir’e un poco manera Fundacion Lotto pa Deporte y FCCA caminda tampoco Gobierno no por yega baha e hunta di supervision. Pa colmo, un di e miembronan acual den Hunta di supervision di Hospital ta Sr. Edwin Tromp, Director di FCCA, cu de facto, conoce e procedura aki manera su “plant’i man”, pues ta consciente cu politica no por mete cu ningun miembro den e Hunta di Supervision.

Luenne Gomez-Pieters ta e unico hende muher den e Hunta di Supervision di Hospital y sigur ta bay laga un masha bon impresion y hopi profesional atras. Separa di su conocemento riba tereno fiscal, el a demostra conhuntamente cu su team na Departamento di Impuesto con pa dirigi cambionan grandi ariba tereno di “change management” y tecnologia avansa y haci e departamento un modelo pa otronan, den cual servicio a mehora hopi. E ta canando un trayecto digital den cual pronto lo uza menos papel y publico mester bay menos na oficina of no mester bay mes! Mayoria transaccion lo sosode “online” di un forma sigur y transparente.

Ki decision e demas miembronan cu a keda atras lo tuma no ta conoci.