E reunion cu minister Rudy Lampe a bay hopi bon, segun presidente di Simar, Sheila Tromp-Lazo. En principio no tabata un reunion cu e minister lo tey presente, pero mirando cu a haya e presentacion awe, unda cu a bin mas contesta riba e preguntanan, e ora nan a ofrece pa tey presente pa asina contesta e pregunta di e miembronan y tambe e inkietudnan. Directiva di Simar a pensa cu ta un bon tactica, pasobra pa Simar mes, si reuni cu e miembronan, preocupacionnan lo bin dilanti y pa bay na minister lo dura un tiki mas y despues bay pa e miembronan.

E forma aki e miembronan por a haya contesta. No por bisa kisas satisfactorio, pero si nan por a haya contesta riba nan pregunta y preocupacionnan cu nan tabata tin.

Preocupacionnan

Un punto cu sigur e maestronan tabata preocupa cun’e, ta nan posicion huridico y maestronan a compronde cu en principio nan ta ambtenaar. Pa nan, como trahado di scolnan publico, otro reglanan ta conta contra esunnan cu ta traha na un Stichting, cual awe nochi nan por a compronde cu en principio, esey no ta e caso. Nan tabata pensa cu nan lo bay perde nan status, drentando un Stichting of e Stichting cu ta cay 100% bek bao di Gobierno. En principio a splica e ora esakinan y a mustra cu en principio un maestro cu ta traha pa un scol publico, bo tin un MB y bo no tin un LB compara cu un ambtenaar, cu ta traha na un otro departamento di Gobierno.

Un otro punto cu nan tabata tin miedo riba dje ta, e procedura di retiro. Con bo ta kita un hende for di trabao, cu den nan concepto ta mas facil pa wordo kita na un stichting, compara awor aki cu nan ta bao di Gobierno, cual tambe a demostra cu e stichtingnan tambe tin cu cana e mesun procedura. En principio e trahadonan ta igual. Esey lo keda mesun cos. Si a trece un punto dilanti cu en principio un trahado di un stichting ta igual na e docente-ambtenaar. Pero si no ta bay existi e docente-ambtenaar mas, e ora na kico e docente cu ta traha na un stichting, ta igual na dje. Eynan tambe nan a bisa cu ta un punto cu a keda para riba dje y sigur lo bay tin den e statuto, e punto aki padilanti unda cu lo pone e docente cu ta pone den e stichting, inclusive awo, e stichting di scolnan publico, unda cu bo ta stelnan gelijk toch e ora, cu nan por sigui disfruta di cierto beneficio como ambtenaar.

E presentacion di awe, a duna un miho bista con esaki por ta hinca den otro y sigur pa e docente y miembronan, unda cu a cambia e concepto cu nan tabata tin cu trahando pa un scol publico, directamente ta un ambtenaar. Esey ta loke a traha riba dje awe nochi. Si mira bon, Aruba ta e unico pais cu no a tuma e stap aki ainda den reino. Por bisa cu riba diferente tereno nos ta un tiki atras como pais. Tin biaha tin decisionnan cu no por tuma pasobra politica ta keda hunga un rol importante. No tin un punt di bista riba esaki ainda, pasobra ainda e docentenan di scolnan publico, mester haya e informacion cu tin. A bisa nan tambe cu lo bin bek cerca nan. Lo bay tin dialogo unda cu lo bay sinta. Kier mira e concepto di e statuto pa mira tambe e ora cua banda ta bay of con por bay deal cu esaki.

Timeframe

Simar a bisa cu si e minister ta realisa cu den 10 luna di tempo mas of menos mester ehecuta esaki pa drenta na vigur hunto cu e functiehuis. Ta algo cu nan mes a bisa cu si yega asina leu cu esaki lo bay ta e paso cu Aruba lo bay tuma, cu lo bay haci tur posibel pa traha den e cuadro aki. E ora e diferente partnernan lo mester por yuda pa haci esaki posibel tambe.