Con henter e asunto ta hinca den otro, ainda no ta completamente conoci, pero si tin confirmacion cu autoridadnan hudicial a start un investigacion penal relaciona cu posibel fraude cu proceso di rijbewijs na Aruba. Y den e caso aki, ya referi na un Rijschool conoci cu ta envolvi, di cual e instructor ta bon conoci riba nos isla. Ta depende awo con fiscal di Ministerio Publico ta mira e caso, pa dicidi si lo bay over na detencion y interogacion di e sospechoso envolvi.
Pa algun aña caba tin hopi keho riba henter e procedura di rijbewijs na Aruba. Den e gobierno di AVP a cambia e sistema y a cambia e rijbewijs mes tambe y a promove digitalisacion. Pero, a bin descubri hopi eror na e oficina di Rijbewijs na Santa Cruz, den cual no tabata sigur cu si tabata eror humano of corupcion. Cu cambio di gobernacion di berde pa geel/blauw, a hinca e trahamento di rijbewijs den man di Censo. Aunke no a bisa nunca, pero tur hende por a compronde e cambio, pa garantisa mas integirdad den e proceso di trahamento di e documento oficial aki, cu ta sirbi alabes como un medio di identificacion.
