Partido RED: Gobierno tin cu kita BBO riba tur comestibel

Entre e puntonan cu partido RED Democratico a trece dilanti durante su conferencia di prensa semanal, a menciona aspectonan di reforma fiscal y a culmina puntrando si e gobierno actual no tin e capacidad pa bin cu solucion simpel pa pueblo of djis no tin e boluntad pa ehecuta e solucionnan aki. Mientras cu algun ta comenta cu e partido cu a forma parti di Gabinete Wever-Croes I mester recobra e confiansa di e votado, Ricardo Croes ta pensa ta dicon no a perde speransa den MEP y AVP a pesar di tur loke nan a haci.

Pa cuminsa, a raiz di e discusion e siman aki tocante un posibel cobramento di impuesto riba tips como parti di e reforma fiscal, Croes a recorda cu algun aña atras, abogado Wix a gana un caso den corte contra un hotel cu tabata practica esaki. Sinembargo, segun e politico, te ainda e situacion aki t’ey, pa cual partido RED Democratico ta pidi pa gobierno para e abuso aki para inmediatamente. Otro peticion cu e partido ta haci ta pa kita BBO for di tur producto domestico. “Pais ta den crisis. Con bo por ta cobrando BBO riba producto domestico; productonan cu hende mester pa biba di dje.”

Croes ta di opinion cu un gobierno eficiente, un gobierno cu por tin e vision manera partido RED Democratico tin’e, ta un gobierno cu por tin persona manera dr. Armando Rudy Lampe, pasobra e ta te aworaki e unico minister cu a demostra eficientemente den finanzas publico. RED Democratico ta bou impresion cu tur loke ta pidiendo gobierno pa haci ta realisabel. Sigur si ta keda den man di RED Democratico pa hacie.

“Kita BBO for di tur comestibel pa nos pueblo por come sin problema. Respeta y cuida nos recursonan limita door di entre otro reparti trabou den un forma husto,” Ricardo Croes a argumenta e ponencia ey dunando como ehempel e studiantenan Arubiano cu ta gradua, mientras gobierno ta acerca pensionado pa traha.

Asina RED Democratico ta keda bin dilanti y bisa cu no solamente nos por mustra dede riba e problemanan, pero ta presenta e solucionnan tambe. Ta puntra nan mes si gobierno tin e capacidad pa ehecuta nan? Gobierno tin e deseo pa ehecuta nan? Y ta kere cu ta pueblo ta dicidi si kier sigui den e situacion aki.

“Hopi hende ta core comenta y pretende cu partido RED Democratico mester gana confianza di pueblo atrobe. Bo kier bin bisa mi cu despues cu MEP y AVP a masacra e pais aki, nunca a perde bo confiansa paso bo ta bay di AVP pa MEP y di MEP pa AVP, pero partido RED Democratico cu a boycott pa su mes un partner den coalicion, bo ta bisa cu tabata kens. Con kens abo ta cu bo ta cu cada rato bo ta keda vota pa e mesun circo?”, asina e politico ta lansa un pregunta sigurando cu nan tin bon intencion, nan a traha bon, nan a traha integro, nan a traha corecto y a traha den e reglanan stipula.