Un hende muhe patapata burachi na stuur di un auto a causa accidente y a purba huy. Pero ora a gar’e, e no a aprecia y no tabatin bunita palabranan pa e polisnan. E no por a ni para riba su pianan di tanto burachi cu e tabata pero esey no a kita e lenga skerpi, den cual el a expresa un cantidad di insulto den direccion di e polisnan.
Diahuebs anochi alrededor di 11:45 pm a sosode un accidente den Schotlandstraat entre un auto marca Nissan modelo Tiida y un auto marca Ford modelo Fiesta color berde. Pero, chauffeur di e Nissan no a para despues di a dal den e Ford y a opta pa sigui core. A start un persecucion mientras cu e Ford a yama polis mesora pa bin asistie, debi cu esun cu a dal su auto a sigui bay.
E auto no a yega mucho leu, pasobra obviamente e chauffeur no conoce e area. Despues di a causa accidente riba Schotlandstraat, el a bay purba crusa drenta un caminda di santo pa bay direccion di Sasakiweg. Pero, e señora a dal den e barancanan cu ta evita pa autonan subi Sasakiweg y despues a bay purba pasa toch pero a pega e auto riba un sero di santo.
Ta ey a descubri mesora cu e señora tabata bastante burachi. Ora polis a yega e no kier a habri porta pa atende cu e defensornan di ley. A dura bastante pa por a convence pa e baha e bentana of habri e porta di auto pa por papia cu ne. Asina cu el a haci esey e polisnan a constata cu e señora tabata bou influencia di alcohol. A opta pa detene mesora na e sitio y a transport’e pa ward’i polis di Oranjestad.
Ora a yega ward’i polis e bahamento for di auto no a bay facil. E señora, cu a bisa di tin 60 aña di edad, tabata bastante altera y a insulta e polisnan di tur forma, uzando palabranan menos bunita. E ked’i present’e dilanti un Sub Fiscal pa e dicidi riba su posibel detencion y encarcelacion mirando e estado cu e ta aden y e daño cometi na auto di otro, debi di tabata stuur burachi.
